RSS Feed
و أنا..أنا..لا شيء آخر

Saturday, September 30, 2006

عارف؟..(ليه سبتني؟)..ممكن

عارف؟..احنا كنا كويسين مع بعض..و كنا هنعمل حالة مختلفة..ماكنتش عايزة منك كتير..بس كان نفسي نفضل مع بعض اكتر من كده..(ليه سبتني؟)ه
عارف؟..اليوم اللي انا فيه كنت مضايقة؟..اليوم ده انا كنت عايزة انط في حضنك و انت بتقولي الوقت؟..انا كنت فاهماك اوي..(ليه سبتني؟)ه
عارف؟..انت بتقول انها ماكنتش الجنة عشان تبقي جهنم..بس مين قال انها ماكنتش هاتبقي؟..(ليه سبتني؟)ه
عارف؟..انت كنت واحشني اوي..كنت باخطط اترمي في حضنك اول ماشوفك..واسند راسي علي كتفك..وليذهب العالم الى الجحيم..حسيت بده في نطقي لحروف اسمك؟..(ليه سبتني؟)ه
عارف؟..انت لما مارديتش علي التليفون..و لما مارديتش علي الميل..انا اتخطفت..كان نفسي اروحلك البيت..و احتوي وجهك بين ايديا الاتنين..و بكل حنان الدنيا اسألك..مالك؟..(ليه سبتني؟)ه
عارف؟..انا كان نفسي اعمل معاك حاجات كتير..كنت بارسم صور جميلة و شخابيط كتير..كان نفسي اشوف الدنيا معاك بعينيك..ياه..كان نفسي..ياما كان في نفسي..(ليه سبتني؟)ه
عارف؟..اول مرة اتقابلنا و احنا عارفين و متفقين..لما مسكت ايدي عشان نعدي الشارع؟..بعد ماعدينا..انا ماكنتش عايزة اسيبها..حسيت انك كمان كنت عايز تمسكها..خدعني احساسي؟..(ليه سبتني؟)ه
عارف؟..احنا كنا لايقين على بعض..شكلنا لبعض..متفاهمين..عارفين..مصدقين..مش عارف..كان مين بيضحك على مين؟..(ليه سبتني؟)ه
عارف؟..انا كان نفسي نروح البحر سوا..و نكتشف الصحرا سوا..و نرجع للعمار..في شئ جوانا ابتدا..(ليه سبتني؟)ه
عارف؟..انا كنت مصدقة..انا كنت عايزة ارقص معاك و اجري و العب و اتنطط..انا كنت عايزة اعيش معاك..انا كنت عايزة حاجات كتير.انا كنت عايزة كتير بس هوا قليل..انا كنت عايزة..ياترى انت كنت عايز؟..(ليه سبتني؟)ه
عارف؟..اليوم اللي اتقابلنا فيه..و قلتلك عايزاك؟..انا كنت باكدب..انا ماكنتش عايزة في الدنيا غيرك..(ليه سبتني؟)ه
عارف؟..انا كنت باعشق طريقتك في الكلام..باحب الكلام اللي بتقوله..فاين لما تتخنق..و بيس لما تكون بتعدي موضوع مش عايز تتكلم فيه..و اوكيه لما مايكونش عندك رد..لسه في واحدة..باحبها..فاكرها؟..(ليه سبتني؟)ه
عارف؟..انا كنت شايفاك عبقري..و لسه شايفاك كده..ضحكت و انت بتقرا...ولا لسه؟..(ليه سبتني؟)ه
عارف؟..الحب حاجة..والعشق حاجة..و لما اشوفك مبسوط..و عينيك بضحك..عندي بكل حاجة..(ليه سبتني؟)ه
عارف؟..انا فيه حاجة جوايا...ديب انسايد..في نقطة سودا بدأت تبان..لأ..انا في حاجة اتحركت و بقت مش في مكانها..انا انكسر جوايا شئ..ياهلترى انت سليم؟..(ليه سبتني؟)ه
عارف؟..انت لسه ماتعرفش شعري شكله ايه..انت ماكنتش عايز تشوفه؟..(ليه سبتني؟)ه
عارف؟..انا عندي احساس...ما يشبه اليقين-ويالا مأساة اليقين-اننا هنرجع لبعض..لازم نكمل..ونوصل..الطريق قريب..ليه بتبعده؟..(ليه سبتني؟)ه
عارف؟..مم..مم..مم!!..مم؟!!..ممكن..ايوه انت فاهم..ممكن..
اللوحة للفنان محمد صبري

Thursday, September 28, 2006

انا باكرهك...!

انا باكرهك..مش طايقاك..غوروه من وشي..مش عايزه اشوفه for the rest of my life...
من فضلكوا حد يتصرف..ده حد طالع مبوظ حياتي..نازل مدمرها ..!..مش ممكن الجبروت ده..
هاتولي كلمة من الشمخ الجواني يتصرف..انت يا بني ادم انت..ازاى اتصرفت مع بي اس؟
ازاى عديتها؟..انت لازم تقولي كده و ترسيني..عشان انا هاتفقع منه خلاص..يا كل البشر
اللي عندهم حد بيكرهوه كده..ابعتولي اى حاجة تريحني منه..انا لما باشوفه باستشعر لذة القتل
و بيتغير ضميري لضمير سفاح..و بتتجه ايدي لا شعوريا لتصوب و تضغط على الزناد!
انا تعبت منه بجد..لو في مترليوز دلوقتي معايا كان زمان العالم صار مكانا افضل بعد خمس دقايق
على رأي احمد خالد توفيق..
يا شيخ روح...الله يحرقك بجاز وسخ..وتتعذب و تتلسوع في الاخرة زى مانت مطلع ديني في الدنيا
لو استمريت كده..مش هاينفع..صدقني مش هاينفع..هاتموت كافر..لأني هاحطك في دماغي و
هاطلع دينك..
اسمع يا كابتن..انا مشاعري بتاعتي..و انت لا تملك الحق في ان تحجر عليها...قلبي يعشق زي
ماهو عايز مش زي مانت عايز..انا اعمل اللي اعمله و براحتي و مصلحتي..هوا انا ماكنتش هصاحب من غيرك؟!
ماكنتش هاحب لو انت مش موجود؟!..ايه الناس الغريبة دى ياجدع؟
ارحم امي..و ارحم اهلك..و اخرج من حياتي غير مأسوف عليك...تصحبك السلامة و الزغاريد و المودعين
و قلتين قناوي و زير!!....

Tuesday, September 26, 2006

مجرد طريق..

كنت اعبرمن ذلك الطريق..انظر الى ذلك المكان الذي جلسنا فيه سويا للمرة الاولي..كاصدقاء..ثم للمرة الاولى كcouple
كما تحب ان تسميه..ابتسم..ثم اتذكر ماقلته..فتتكسر الابتسامة على صفحة وجهي..انقبض..انظر امامي للطريق..
كى لا اصطدم باحد..فاصطدم باحد فعلا..اتمنى ان يكون انت و يكون هذا العناق الغير مقصود هو هدية الهية لي..
عدالة السماء اخيرا..اكتشف انه ليس انت و انها سخرية القدر..اعتذر و امضي في طريقي..ارفع ناظري للسماء..
اسألها.."بأى ذنب قتلت؟"..ثم اتذكر انها تصاريف القدر..فابتسم..و اعتذر..
المحك على الجانب الاخر من الطريق..بلا حذر اعبر..فلا المح وجهك في زحام البشر..
اصبحت وجها من الوجوه التى على الشط..
اعتبرت نفسك عاقلا..و رفضت..
رفضت..و قتلتني تحت دعوى الحذر!!

Friday, September 22, 2006

الهم واحد والملل مشترك..

تعرفنا منذ فترة..وبالأمس القريب تحدثنا..لا ادري لماذا شعرت في داخلي..اننا نتحدث عن نفس الشخص..خامرني شعور لا منطقي و غير طبيعي..اننا سويا نمر بنفس الاحداث مع اختلاف الترتيب الزمني
رغم ان التحفظ في سرد التفاصيل كان واضحا منك..و الحرص يتساقط من كلماتك..هول القصة يجعلك ترغبين
في الحديث..وان تحكي للعالم و ليس لي فقط..دموعك التي تهدد بالسقوط في اي لحظة...كارثة تنتظر الحدوث..في الحقيقة...خفت ان الح في السؤال-بغرض الاطمئنان لا اكثر-حتى لا انكأ الجرح الطازج..
و انتظرت ما ستقولينه و فقط..كنت انت خائفة على مبدأ الخصوصية والسرية التي التزمت بها...و كنت انا مرعوبة ان تقولي اسمه او اي شئ يدل عليه فيتضح لنا انه هو..خدعنا معا..او جرحنا معا..و ربما عبث بنا سويا..اسمعك..و اتخيل احساسي في مثل هذا الموقف من عدة اشهر..اري ملامح وجهك المتأثرة التي تنطق بالمرارة..و اتذكر كيف لم ابكي و لم اذرف دمعة عندما سمعت كلاما اقل ما يمكن ان يوصف به انه قاسي ..لم ارد عليه سوي باني اريد الفهم ..لماذا اذا منذ البداية؟!..حتى هذا بخل به..لم يدر بعقله لحظة هول ما يفعله في مكالمة هاتف..اغلب ظني ان المكالمة كانت مكلفة ماديا..رغم اني التي اتصلت..كانت مكلفة معنويا و روحيا وعاطفيا و نفسيا وفكريا..ربما استنفدت مخزوني من الفرح لعدة ايام..غرقت في خواطري..و نسيت ان التشابه بيننا في الغرق في الخواطر مشكلة اخري..اعود الى حديثك المتحفظ..الذي يذكرني ايضا بتحفظي في الحديث عن التجربة السابقة..مما يدفعني الى ما يشبه اليقين انه نفس الشخص الذي يهوي السرية و المداراة..لم اكن اتخيل انه كان يكذب..الا انك قلتها عنه...نسيت انه اكبر مني في السن..الا عندما صرحت بها..نفس (الطقطقة) على حد تعبيرك و نفس الاختلاف الذى-من الواضح-اننا نعشقه سويا ..العديد من القواسم المشتركة..الفرق الوحيد...اني نسيته فور انتهاء عهد العشق بيننا..نعم كان عشقا..بالضبط نفس التوافق و الانسجام..حبا سماويا..لا احد من البشر يدركه..الفارق..اني بعدها رأيته..كان لم اعرفه من قبل..و نجحت في الاختبار..لم اذرف عليه دمعة..ولم امنع لاجله ضحكة..اكمل الطريق..لست وحدي..اؤمن بنفسي و قدرتي علي الاستفادة و التعلم من تجاربي..اعتبرته صفحة جميلة..اتذكر ما كان بيننا و ابتسم و اضحك علي الجميل..و لا يبكيني القبيح..انتهي لأن له نهاية..و لان الحياة عاهرة..و انت لا تجيدين التعامل مع العاهرات..صدقيني..في زمن قادم..ستتعلمين كيف عندما تصفعك الحياة تديري لها وجهك الاخر..لان كل صفعة درس..و كل درس في الدنيا ميلاد..و مع كل ميلاد ابداع جديد..و امل اخر في حياة اجمل..ستكتشفين ان التعامل مع العاهرات ليس بهذه الصعوبة..!!....
صديقتي..سامحيني ان كنت قد اثقلت عليك ولكن سخرية القدر اقوى منك و منى..
صديقتي..سيأتي احد..يقدر جوهرتك الداخلية
صديقتي..ستستندين الى شخص..كانك تستندين الى نفسك
صديقتي..ربما بعد قليل لن نكون معا..ولن نتقابل مرة اخري..
و لكن عندما تقابلي هذا الرجل..تذكريني و اذكري اننا اذا دخلنا سويا محلا يبيع الرجال..
فسنتقاتل على نفس الشخص!!
اللوحة للرائعة زينب السجيني

Declaration...

يا جماعة انا نزلت الشعر-المحاولات الطفولية او المراهقة بتاعتي-علي البلؤ..دي اول مرة..ممكن تكتبوا التعليق من بره عشان اول ماخش اعرف حجمي الطبيعي و اعرف قيمة نفسي كده عالسريع....من غير مالف كعب داير علي المحاكم ورا القضايا اللي هاترفعوها عليا؟..ممكن؟! اسكن بيوت الفرح اه ممكن..ايه ده؟! انا قلبت منير ليه كده فجأة؟!...معلش يا بشر..اصل دي اغنيتي المفضلة..وانا بدأت اهرتل تقريبا ..وكده كفاية اوي...صفروا في ودني بس براحة
ok?

حتة هرتلة..

الحب زي الطيور....مش ممسوك
الحب زي الطيور..مدبوح من الالم
الحب زي الطيور...غالبا علي الشجرة
الحب زي الطيور..صعب التحليق اليه
الحب زي الطيور..عش هنا و عشة هناك
الحب زي الطيور..اهو كله بيض وخلاص!!

الراي..وتحتيه الرأى الآخر!


بكلمة وماله تحكم من غير خطب غويطة
ولا سياسة وحاوريني ..يا كيكا
بماله..واللي نعرفه احسن من اللي مانعرفوش
تنمحي الوشوش وتختفي الوحوش
اغرس الكلمتين دول في شوية ناس
و انت تشوف اللي ماشفتوش
و تحكم اللي مايتحكموش
بالعبيط يابني هيطيعوك
و بالهبل هيسمعوك
وهاتجرهم..بالضبط زي ابوك..
*****
صاحبي..
عارف اخر كلامنا ايه؟
بدون حذر وحرص و نظرات حويطة
ولا العصفورة اللي بتبلغ ..
و لا وجع دماغ وعنترية و زمبليطة
طوبة يابني..لمن مشي جوه الحيطة!

الاعصار..

فررت مني..غير مبال بفرح او انكسار
انكسار لقلب عاش عمرا يضئ كالنهار
تعود عليه..فلا ليل ولا حتى ظلال
تجبرت كثيرا..حتى القمر دار
صدقني..ماعدت اشتهي قربك و تلك الديار
صدقني..ماعدت اريد اقترابك ولاحبك ولاتلك النار
صدقني..ان كنت في لحظة قد ذللت نفسي
وتكسر علي يديك قلبي وسالت دموعي بانهمار..
فالان اعلم ان ذلك العصفور..قد طار

Tuesday, September 19, 2006

ironically..!

to all people around the world..People from all countries..To who concerned...
I went today to my faculty and I found a big fat surprise..My friends..Guess what?
ana kont hasora2...Am taking a computer course this semester ,and what's about?
it's about-not the full name- networking..!
ironically!
first class:
network:collection of computers and other hardware connected together to share data,hardware,software,...
and to facillate electronic communication like (e-mailing)

Monday, September 18, 2006

spot light...


العروسة بتلبس ابيض يوم الفرح..و الميت بيتدفن في كفن ابيض.
-اشمعني سبنا انه لون الموت و مسكنا في ان الابيض لون الفرح؟

-ليه الناس و هيا بتعزي بتلبس اسود مش ابيض؟
و غريب ان الاسود لون الموت..مع ان الكفن ابيض..و غريب ان الابيض لون الفرح..مع ان الاوضة يوميها بتبقي ضلمة موت!
سؤال بقي علي جنب كده:هوا الحوار ده ليه علاقة بموضوع الوجدان
الجمعي و الاطار المعرفي؟

احلام عادية..

انا عندي حلم بسيط و عادي..مش محتاج فلوس كتير..مش محتاج فلوس اصلا...الحلم ده مش محتاج اي حاجة..غير ان الناس تفهمني و بس..و ان مافهمتنيش يتقبلوني كما انا....و خلاص...
حلم بسيط و عادي..اني امشي بشعري في ميدان التحرير..يا دعاء انا مش عايزة اطلع رقاصة..يا أميرة انا مش عايزة المجتمع يتكلم عن الأندروير..يا حنان انا مش عايزة اجوز عرفي..انا مش عايزة اجوز اصلا..هاقضيها كده!!
من وحي ضربة شمس الاسبوع اللي فات

عزف منفرد..


خرجت في الصباح..لم احمل سوي سجائري
دسستها في جيب- سترتي الرمادية
فهي الوحيدة التي تمنحني الحب ..بلا مقابل!
امل دنقل

ليس سوي ان تريد..

ليس سوي ان تريد..فانت فارس هذا الزمان للوحيد..
العنوان الجامد ده لأمل دنقل طبعا..مما لاشك فيه
فارس هذا الزمان الوحيد..في رايي المتواضع طبعا..عشان ماحدش يطلع و يقوللي البوست ده عن حسن نصرالله..و يزيط في الزحمة ..هو الانسان اللي شدني ليه كده من غير اي مناسبة...انسان جميييل الي اقصي درجة...ماحدش ليه دعوة..انا عاجبني يا جماعة..انسان متمكن جدا في مجاله..متمكن لدرجة الاستفزاز..لما بيفكر في اي حاجة ايا كانت بيفكر فيها باحتراف..انسان احترف التفكير..ليه اسلوب منطقي جدا في الكلام..الاول نتفق علي المصطلحات اللي بنتكلم فيها عشان مانتوهش..مرة باساله سؤال برئ من نوعية هوا انت في حد في حياتك؟ فيقوللي يعني ايه؟...يعني مصاحب حد؟..يرد بمنتهي الشجاعة..هو يعني ايه صحوبية اصلا؟..و نخش بقي في حوارات فلسفية عميقة عن جدوي الموضوع ووضع اطار مناسب ليه..و نختلف او نتفق...بنخرج اصحاب..واحد بيحل مشاكله بالاستبعاد..عايزين ايه يا خلق هوه؟!.زازاي مايعجبنيش؟!!!
فظيع اوي و هوا بيكلم..انا بحبه و هوا بينطق الكلام اصلا..ليه كده اسلوب معين..في حروف بيتك علها كده و يعوج بقه علي جنب شوية..زي مثلا كلمة..(يعني اعمل ايييه؟!!)و خلاص شوية و هيقولي احة..و انا انسانة باحب الناس اللي بيسموا الاشباء بمسمياتها زي عنيا كده..و الصراحة راحة يا روحي و .....مش ممكن....
و ياسلام بقي لو بنكلم في موضوع...و ده عايز يوضح بمثل..يا نهار اسوووود..باحس اني محتاجة اذاكر كتير..مش عارفة اذاكر ايه علشان السياحة.بس احساسي اني عايزة افهم اكتر..و انو فيه حاجات ضخمة انا مش عارفة عنها حاجة...وانا شكلي مش هيعرف اصلا ولا نيلة..ده كفاية انه مرة كنا مروحين مع بعض و ماشيين بنمد و انا متاخرة و ده و قف فجاة علشان..و لا بلاش هو عارف..و لا يا سلام اما قلت نكتة...الشغل في كل حاجة..التعليق علي النكتة..يقوللي اصل انا مش عارف ايه؟!
طبعا انتوا هتموتوا تعرفوا هوا قال ايه بالضبط..بس ممكن تستنتجوا لو عرفتوا انها النكتة بتاعة الانبيا اللي كانوا بيلعبوا طاولة..و لا اقولكوا استحالة تعرفوا اصلا..لانه قال حاجة خزعبلية فضائية..ما يجيبهاش الا واحد من اياهم اللي زيه...اللي ما يتسموش..:)
بجد انا باحس انه عبقري..بغض النظر ان عبقرية الاخرين في انهم يعرفون مالا اعرفه انا..يعني لو واحد عارف انه في بلاعة في الشارع اللي ورانا و جه قاللي و انا ماعرفش..هيبقي ايه ده!!واو..عبقري!!..و دي طبعا وصلة تريقة من سيادته علي مفهومي عن العبقرية..
ده غير بقي انه مؤمن بالوقت بالهبل..و انا عندي مشكلة في الموضوع ده..انا بني ادمة مراهقة..عايزة كل حاجة و دلوقتي حالا..ماعنديش اعتراف بموضوع خليها للزمن ده و باتخنق منه جدا و بابقي عايزة انط الايام..طبعا كل واحد دلوقتي يفتكرلي هشام عباس و زمان و انا صغير و هبل من ده..المشكلة اني عارفة جدا اوي خالص مالص..(و لما انتي عارفة!!) اقول ان الموضوع مش اندر كنترول اوي كده يا..يا..يا..مين؟..ايه ده هوا انا بانده علي حد وما بيردش و لا ايه؟!!
بص بقي علشان انا زهقت من الكتابة..و بدأت اهيس و اقع في الكلام و هنتشرد علي ام البلؤ ده..انا اخترت...و قررت..و بدات..و اتعودت استحمل مسئولية قراراتي بمنتهي الشجاعة..و لا املك ان اقول لك سوي ما قاله اسد الصحراء عمر المختار لجزار فزان الكولونيل جراتسياني:
"نحن معكم الي نهايتكم او نهايتنا"

لازم يقول حاجة علي انا فيه!

اوقات احس...كاني علي مفرق طريق
احتار..و يصبح قلبي في الافكار غريق

صلاح جاهين

الحب زي الطيور..!

احم..احم..الواحد مش عارف يبتدي الموضوع ده ازاي..بس هوا مأساة اغريقية و لازم الواحد يتكلم فيه عشان يستريح..المشكلة انو في ناس كتير اوي مالهاش علاقة بالموضوع لا من قريب و لامن بعيد..و رغم كده الواحد خايف منهم كيك..و مش عايز حد يعرف ولا يفهم..و غير كده كمان الموضوع مش حدث اوي يعني..بس المشكلة انو في اطراف شايفاه حدث ضخم و شنيع و ازاي و (يا نهار ازرق )..و اطراف تاني شايفينه حاجة عادية و طبيعية و مش مستاهلة اصلا..و بالعكس انا عن نفسي باشوفه في بعض الاحيان لازم يحصل..و فترة اساسية من حياة اي بنت وولد في مجتمعنا الجامد...و ..
ايه ده؟!!..انا عمالة اتكلم كده من غير ماقول ايه الموضوع اصلا..و زمان الناس راحت علي بوست تاني من الملل!..المشكلة يا جماعة ببساطة..اني انا معجبة بحد..هوا مش وقت تزويق ..يعني الموضوع داخل في سكة حب..علي الاقل بالنسبة لي عشان ماحدش يتخض..و انا شايفة ان البني ادم ده جميل و يستاهل بجد.انا اللي اخترته يعني هيكون اهبل؟! ولا بريالة؟!بالعكس..المهم ده موضوع البوست الجاي مش موضوعنا حاليا....سخرية القدر بقي..ماهو لازم سخرية القدر مادام انا في الموضوع...ان الموضوع معقد جدا..و منفد علي بعضه و عالهوا كيك..و في كمية بشر بالطورناطة يعرفوني و يعرفوه..و البشر مش هيتقبلوا ده بسهولة..لانه اولا مفيش اي نوع من انواع الالتزام..او الارتباط الرسمي..تانيا..انه ماينفعش..كده ببساطة..مش عارفة ايه الاسباب المحددة المنطقية..و ياريت حد يفيدني في الموضوع ده..انا خايفة ان الموضوع مايمشيش او مايكملش او اي كلمة اخرها ش عشان حاجة تافهة و هبلة او حد فاكر نفسه بتاع ينفسن عليا و هيا مش ناقصاه..فيها اللي مكفيها انا اصلا بدأت اشك انه بيكن ليا اي نوع من انواع المشاعر من كتر احساس عدم الارتياح اللي هوا فيه..و ابقي بابصله كده هاموت اسأله..و ماسألوش..بجد احساس وحش و مش مريح..انا بدأت احس اني قاعدة في القسم من كتر كلمة عدم الارتياح..انا ممكن اكون غلطت اني فكرت ان احط نفسي و احطه في الموقف ده؟..و تبتدي بقي حوارات المصلحة و بتاع و صخور بالاشعاع؟..مش عارف.انا بافكر كتير اوي من ساعتها و دماغي هتنفجر من كتر الضغط..لدرجة اني خبطتها في الحيطة مرتين تلاتة عشان تهدي و تنام كده و تستكين مافيش فايدة..علي راي سعد زغلول..و نفسي عمالة تقولي حاجات غريبة من نوعية كبري دماغك و خلصي بقي..موضوع هيتعبك و يخنقك و يطلع دينك من الاخر بناقص..يعني هيا جت عليه؟!..و انا مش عارف.المفروض-من الفكرة المسبقة-ان المواضيع بتاعة الحب و الكلام ده تبقي حاجات لذيذة و مفرحة كده و كتكوتة...مش الواحد يقعد يقهر نفسه في متاهات و حوارات غريبة من نوعية قضية الذات و الوجود..و هل نحن نستحق؟..و بجد اللي عنده حاجة يقولها و ينفعني و اللي ماعندوش نورنا و شرفنا و بجد..............انا مش عارف!..

Friday, September 15, 2006

عمره ما موت حد..


شوية بشر قاعدين-انا و اخويا و قرايبنا-..قاعدين قعدة بايخة..الساعة اربعة الفجر..عايزين اي حاجة يعملوها علشان يقضوا الليلة السودة اللي مش راضية تعدي دي..خلصنا النت و رحنا السينما و اتمشينا و قعدنا علي القهوة و عملنا كل حاجة..من الاخر..خلصنل حتي الأكل و الشرب الغتت..اليكم اقتراحتهم عشان يقضوا الليلة:
"يللا نقوم نروح البحر دلوقتي علشان نغرق و نخلص"
"يللا نلعب كوتشينة عالهدوم" ده اخوبا بما انه في بنات في القعدة..
"يللا نسكت بقي و نقوم ننام بدري مرة في حياتنا من غير ما نتقرطس"
"يللا نولع حريقة في نص الشارع و نصوت علشان الناس يصحوا معانا"
"يللا نقول نكت ابيحة"
"ممكن اكل كمان ساندويتش؟"
"قوموا اغسلوا يا ختي انتي و هيا"دي طبعا ماما صاحية من النوم تقوللنا كده و تنام تاني"
انا لسه قاعدة ساكته و مقولتش ممكن نعمل ايه..كلهم التفتولي و سألوني..ها؟..
بصيت فجأة قلت.."يلا نضحك لغاية ما نموت!"
و للغرابة..قعدوا يضحكوا و انا اتفرج عليهم..و لا واحد فيهم مات!!

من وحي المحاكمات الدولية..


دول ناس ما نافعش معاهم حاجة يابا..لا قانون ولا مجلس شعب ولا صحافة ولا اعلام..لو عندنا قصر ملكي بذات نفسه..مياكلش..ياعم دول ناس ما ينفعش معاهم الطيب..تقوللي قانون و دستور و منظمات مجتمع مدني..اقوللك هأو. تقوللي دي دولة مؤسسات؟!..اقولك الله يرحمك و يحسن اليك..تقوللي..قانون دولي و محاكم دولية و افشخنات و قلة ادب من دي..اقولك سبحان من ابدعك..علي رأي وحيد حامد في فيلم الارهاب و الكباب..لما قال على لسان كمال الشناوي "الحكومة مالهاش دراع علشا يتلوي" تقوللي و انت يائس و حزين..ايه العمل؟..ارد..و الله مادام الطيب و القانون و الأدب ما نفعش..يبقي
"انا عندي حل معتبر.
..نبقي غجر!"
صلاح جاهين

البشر..برضك البشر..!


مرة كنا قاعدين شلة اصحاب في وسط البلد-طبعا وسط البلد لأنها الوكر بتاعنا-و حصل موقف غريب..قاعدة صاحبتي مستنياني..جات واحدة غريبة الشكل..ست اقل ما يقال عنها انها عجوز متصابية علي رأي احمد خالد توفيق..و شمطاء كمان ..بما اننا جبنا السيرة..المهم انها جت و قعدت جنب صاحبتي..جه القهوجي اقنعها انها تقوم و تقعد علي التربيزة التانية اللي جنبها و فعلا قعدت..بس زي ماتكون قاعدة معاها..انا جيت..حصل نفس الموقف قاعدة زي ماتكون صاحبتنا الأنتيم..باقي الشلة جت..قعدت تسمعنا برضه و احنا عمالبن نلقح بالكلام..في كيلو ودان مرمي علي حجرنا..خير يا بشر؟!..سماعات الودان عاملة شغل..مشيت الست..و بعد شوية..جه راجل غريب بيبيع حاجات غريبة و بعدين وقف جنبنا يسمعنا..برضك..وقف شوية لغاية ماخدنا بالنا..و بصيناله..خير يا عم الحاج؟!..ابتسم ومشي..بعد شوية..جم شلة شباب غريبين كده و قعدوا جنبنا يسمعونا و يتفرجوا علينا و يضحكوا..و فضلوا واقفين و احنا بنتكلم..زي ما نكون في المخابرات الحربية..تصنت علي درجة عالية من الكفاءة..رذالة برذالة بقي..قعدنا نلقح عليهم..لغاية ما مشيوا..فيه ايه النهارده؟! الناس عمالة تسمعنا زي ما نكون راديو..بعد شوية..قمنا علشان نروح بقي..كفاية كده..و احنا ماشيين؟؟عدينا علي ترابيزة..قاعد عليها شوية ناس شكلهم غريب و بيتكلموا بصوت عالي جدا و عمالين يضحكوا و يشيشوا و يغنوا..و تقريبا في نكتة ابيحة بتتقال..و احنا ماشيين هدينا شوية..و بعدين وقفنا..ليه؟..ده سؤال برضو؟!..علشان نسمعهم بيقولوا ايه طبعا!!

انا المصري!!..قصيدة في حب شهداء لبنان..

المبدع..اللي خلي الشعر العامي بيتقال ف الشارع..عم عبالرحمن الأبنودي..او الخال كما يحب ان نسميه..جه من كام يوم كده في العاشرة مساء مع منى الشاذلي..و قال اجزاء من القصيدة دي..و رفض يكملها..قال ايه علشان محرضة!! و حيث انها كده..و الخال لسه سايب شعرة معاوية لغاية ما تتقطع لوحدها..و اسهاما منا في القطع..و تبرعا منا في التحريض..يمكن ام الشعب ده يتحرك..كان واجبا علينا اننا ننخفس ع النص الأصلي الكامل..عشان خاطركوا ك شعب..و عشان خاطر مصر يا رأفت!!
انا المصري ..!
انا المصري..كريم العنصرين
سليل المخلصين..المؤمنين
و حامي الامة في وقت الشدايد
و شقاق السكك للواردين
و دمي ملك ليكم.. اجمعين
انا المصري
كريم العنصرين.

انا المصري كريم العنصرين..
فقدت العقل و الصوت والايدين
و بعد ما كنت نجدة و روح ووقفة
مانيش عارف نسيت ده كله فين
و مين اللي سلبني اسمي مين؟!
انا المصري..
كريم العنصرين..؟

و كنت اصرخ اطفي النار بصوتي
و يحيي امتي في الشدة.. موتي
فمين اللي كتب عاري ف جبيني
و مين اللي سرق شعلة سكوتي
و انا اللي غنايا صحي العالمين
انا المصري
كريم العنصرين..؟

انا متباع..ماهيش عادتك يا وطني
عدو..لعدو..و مين ما قبضش تمني
صبي البقال يتاجر في الضماير
و احلا عمري ضاع مستني زمني..
بقينا بصمتنا-المت..مكتفين.
انا المصري
كريم العنصرين

كأن الوحل..شد الرجل مني
انوح و ابكي و اتا قاصد اغني
وواقفين ع الشطوط بايادي سودا
محال..حيغرقوني غصب عني
ولو نصبوا في قلبي ميت كمين
انا المصري
كريم العنصرين.

بنيتها من الهرم للسد..يدي
بنتها كلها ف لحظة تحدي
و كنت زعيم نبيل مل بين جيفارا
و تيتو و كاسترو و نهرو و غاندي
و مش محتاج اقول انا كنت مين؟
انا المصري
كريم العنصرين!!

و كان يخطب تصيب الدنيا ربكة
و من لبنان يعود اسطول اميركا
ولينا في الوجود كلمة و مكانة
واخوة في الأمل..دمعة و ضحكة
و رقابينا الأبية…مرفوعين ..
انا المصري
كريم العنصرين..!

وجونا اللي رمونا.. للمهالك
تقول"لأه"يقولولها:"و انتي مالك"؟
تقول:"لبنان.. احبابنا الأعزة.."
يقولوا:"يغوروا و تغوروا كذلك".
نسيت من همي ابقي ازاي حزين!!
انا المصري
كريم العنصرين

و بعنا
كل شئ ينباع.. بدقة
بشفافية و من غير اي سرقة
و نظرنا لعلم النهب..صرنا
بننهب كل شئ..لكن برقة
بقينا دكاترة وسط النشالين!
انا المصري
كريم العنصرين.

زمان كان في ملك فاحت روايحه
و ثوار جيش بروحهم يومها.. ضحوا
و كان لنا شأن حتي في الهزيمة
وطن..كان يعجبك جمعه و طرحه
علينا عين.. و باقي الأمة عين
انا المصري
كريم العنصرين.

و عاد تاني الملك يحكم بلاده..
ومن بعد السنين دي..زاد فساده
و كنا سادة فوق ارض الكنانة
و أصبحنا عبيده..أو عباده
و ضاع في الزحمة مشوار السنين..
انا المصري
كريم العنصرين.

وتاني يالفقير عاد من يخونك
و تتهان في بلادك عيني عينك
ولا الدين مكتفي من مص دمك
و لا عارف ديونهم من ديونك
و جيت للحق؟..كله سلف و دين
انا المصري
كريم العنصرين.

و ده يسلم لده و العصر فاجر
وتاجر حنت..سلمنا لتاجر
وأم الأمة مصر الأنسانية
بتتآمر..وبتداري الخناجر
و كنت النجدة و استنجد بمين
انا المصري
كريم العنصرين..؟

و كنت اصرخ..وكان الكل يسمع
و أمد الأيد..عدو الأمة يرجع
وجاني النطع يأمرني و يشخط
وخلاني بقيت في الحق انطع
انا اللي كنت اصحي الغفلانين
انا المصري
كريم العنصرين!!

و كانوا يقولوا:"مصر"..الشمس تطلع
و تعلا رقابنا فوق..و عيوننا تلمع
و كنا نشيل قلوبنا فوق كفوفنا
و بصدورنا نواجه أي مدفع
فمين ساعدنا ع الوضع المهين..؟
انا المصري
كريم العنصرين!!

وأزاي النهاردة الدم.. عومي
مقلقل صحوتي و ساكن في نومي
دمانا بتشتعل في أرض غزة
و لبنان..نارها ماسكة فب هدومي
وانا اللي في الأسي واقف ما بين!!
انا المصري
كريم العنصرين.

و لولا النظمة العربية لامت..
و في صفوف العدو هتكون و كانت
ما كان الموت عرف"صيدا" و"بعبدا"
ولا كانت قيامة الغدر قامت
و لا قلب العرب بيت حزين!
انا المصري
كريم العنصرين.

و شوف لبنان بترحل من جنوبها
و نوم الليل..ما بيعرف جنوبها
سطور النمل زاحفة للملاجئ
و ريح الخونة ما هدت هبوبها
الوف راحلين في قلبي مذعورين!!
انا المصري
كريم العنصرين!!

فيالبنان انا..م اللي خانوك
يا حزب الله حكامنا باعوك
يا صاحبي..ما عدنا نملك غير هتافنا
هتافنا مر..مالي رقابنا شوك
و علني..بنفعل الفعل المشين!!.
انا المصري
كريم العنصرين.

يا(نصر الله) ده..زمن البياعين
و انت طلعت للأمة ...منين؟
تفكرنا بكل اللي نسيناه
اظنه صعب يصحوا الميتين
و خليتنا-الجميع-متفرجين
انا المصري
كريم العنصرين؟

مازال نفس العدو..و مازال خببيث
ابونا مات و سابهولنا ..وريث
و مهما يلف و يدور..راح يغور
و اسأل عندنا بيوت السويس
حلاوة روح ..و حياة الحسين!!
انا المصري
كريم العنصرين.

بقت رايتك خلاص رمز لجهادك
بقت رمز المقاومة في بلادك
و لبنان كلها بايتة في ضميرك
خلاص صبح الجهاد ماءك و زادك
لغير المسلمين و المسلمين!!
انا المصري
كريم العنصرين.

بلاد الامريكان احنا و صهاينة
و صمتي ع اللي حاصل..كله معني
مازال الحلم لم فارق دمايا
علي رغم اللي عاشه طعنة طعنة
يالبنان الكرامة..لا تلين.
انا المصري
كريم العنصرين.

و يا لبنان ما تطفيش نار نضالك
رجالك..حتي لو ماحناش رجالك
بحور الدم ما تغرق حقوقك
ولا تكسر مقاديف احتمالك
حبيبك...بس مش قادر اعين..
انا المصري
كريم العنصرين!!