RSS Feed
و أنا..أنا..لا شيء آخر

Tuesday, April 15, 2008

شفتاه...(شفايفه)0

(عليه شفايف عايزة تتقطم)..يا تري كيف هي قبلته؟..بالتأكيد عبقرية..عينيه تقول ذلك..(كان شكلي وحش أوي،وانا باتكلم في حاجة،وبابص علي حاجة تانية خالص)..الشفتان معا يكونان خريطة..الشفتان جزيرتان..تطلان علي محيط..(يا تري باتقفش وانا بابص البصات الغريبة دي ولا لأ؟)..الشفة العليا..دنيا..ليست قاسية..بها مساحة للعشق..هي شرفة تطل علي الحرية..(شفايفه حلوة أوي بجد..حد يقوله يرحم بقي)..الشفة العليا محافظة قليلا..قد تفكر قبل ان تفعل..فكري يا صغيرتي.. وفي آخر الأمر انتهي عندي..(أكيد عارف ان شفايفه حلوة..مش ممكن أكون انا بس اللي عارفة)..الشفة السفلي..مجنونة..طائشة..تهوى اللامنطق..وتحترف الغواية..لها العشق الصافي..وعليها التباطؤ في المناطق الرمادية..هي جريئة..لا تعترف بهنا أو هناك..أنها شفة"هنا والآن"..(اهو ده مثال واضح علي الشفايف اللي لازم تتقطع بوس)...لا يدر هو كم تعذبني هاتان الشفتان..أم يدر ويهرب؟..ام يدر و يكابر؟..(تعبت بقي)..شفتاه رواية متكاملة الأركان..كيان منفصل..يعبر بهما كما يعبر بعينيه وأكثر..شفتاه تعرف ماتريد..ولأي مدي..هما ذكيتان..ومتواطئتان مع عينيه علي قدرتي علي الإحتمال..(ده أكيد متراهن عليا مع أصحابه..كده لازم يتباس..الحوار ماخلصش علي كده)..كثيرا ما أفكر..ماذا لو قبلته أنا؟..أو مددت أصابعي أتلمس طريقي في دنيا الشفتين فقط؟..أسير في التعرجات بحذر..وألتف حول النتوءات..وأنحني مع الإنحناءات..وأبطئ السير في زخم المشاعر..(أكيد هو عارف اني حد مجنون..والله ممكن أعمل فيه حاجة..بجد..مش باهزر)..ليس في الأمر انتقاص للرجولة..ان أبدأ أنا ..بالخطوة الأولى..
______
the song for frank sinatra"can't take my eyes off you"

Saturday, April 05, 2008

اضراب عام لشعب مصر..الأحد 6 ابريل


يا سيدي حتي مش من باب السياسة..ولا من باب المشاركة..ولا من باب المواطنة..مش عايز تاخد اجازة م الشغل؟؟خلاص انت كمان بقيت قتيل الجامعة؟..وانتي مازهقتيش من اللت والعجن في المصلحة؟..ارحمو نفسكو يا ناس..مجرد كلمة اعتراض شعبية للنظام..وللأسعار..والغلا..والفساد..والانتهاكات اللي بتحصل في المحليات..في الترشح وانشاءالله حتحصل في الانتخاب..يوم واحد بس ضد اي حاجة غلط وضد اي حد موافق عالغلط..وقفة لمصر..وقفة بجد..لشعب مصر..لو نزلت الشارع لازم تساعد المتظاهرين وتتضامن معاهم..تلبس اسود او تعلق علم مصر عالعربية..اقف معاهم شوية في التحرير او في ميدان المحطة في الجيزة..لو مانزلتش الشارع تبقي عملت حاجة لنفسك..قبل للبلد..عملت لاحترامك لنفسك..ولحقوقك..ولأهلك..وولادك اللي عايزنهم يتربوا في بلد نضيفة..
6 ابريل..يومنا احنا..يوم المصريين..مش طالع من حركة..ولا طالع من جماعة ولا من حزب..ده يوم طالع من حرقتنا..ومن طلعان ديننا بقالنا كتير اوي..
شارك..لنفسك..قبل اي حاجة تاني.
_______________________
لو قابلتك مشاكل في الاغنية..هي عدي النهار لعبدالحليم حافظ وكلمات عبدالرحمن الابنودي..اسمعها و دلوقتي!