.عودة الى ذلك الهسس الطفولي المحبب

ليه مش بقيت بتلعب معايا زي الاول؟!و قاعد علطول بتتفرج عالكتاب ده؟..هوا فيه صور ملونة؟

انا عايز اشوف انا كمان!

________________

تعالي نجري نجري نجري و ننط من فوق السور اللي ورا الجنينة..لأ ليه؟

ايه يعني اما حد يشوفنا بنجري في الشارع؟..انت بقيتي وحشة اوي..هاه

__________________

انا زعلانة اوي..امبارح بابا زعقللي لما عرف اني كنت باتفرج معاك عالكتاب

و قاللي متروحيش عندهم تاني..يعني مش هنلعب بالميكانو....اصل ماينفعش ننزل بيه الشارع..

ممكن حد ياخده مننا.. اسمع الكلام

__________________

شوفي انا سبقتك ازاي؟..انا باعرف اطلع السلم اتنين اتنين و انت لأه!!! انتي بقيتي بطيييييييئة

هاهاهاهاهاها

_________________

لا مليش دعوة...انا عايزة شوكولاتة..مش عايزة انا اللي بالمنجة ده..مش هاكله ماليش دعوووة

طب لو بتحبني..هاتلي شوكولاتة..ماشي؟

__________________

يا ......تعالي نروح نجيب ملح من عند الكشك..في كلب هناك..انا بخاف اوي من الكلب..هيعضني..مش هاينفع اروح لوحدي

..انزل بقي ماتبقاش وحش

___________________

انا مش هاطلع البيت..انا هفضل قاعدة عالسلم كده...اصل ماما و بابا بيكرهوني..انا مش بنتهم..

ماما قالتلي انهم لقوني علي باب الجامع..

"بكاء هيستيري"

__________________

علطول ماسك الورق و الاقلام..و الشنطة..و الخشبة دي..و بقيت مش بتيجي نلعب سوا بالعرايس

و بقيت بتعد في المدرسة كتير اوي..انتو بتاخدو حساب زينا؟ اصله صعب اوي!

___________________

انا مش عارفة اشوف حاجة...حد يشيلني بقي..حد يشيلني عايز اشوف الدب

بسرعة قبل ما يمشي..بسرعة

___________________

"عياط"ايه يعني لما ارسم علي الورق بتاع بابا؟؟ انا رسمت حاجات حلوة و الله..رسمت بيت و شمس و وردة

و لونتها كويس..ماطلعتش عن الخط..و السما كان لونها ازرق صح؟!

___________________

شوفتو ايه اللي حصل امبارح؟..شفت واحد بيبوس واحدة!!!...اه و الله بس بيبوسها في بقها...هشش

وطو صوتكو ده..لحسن حد يسمعنا يقول علينا قللات الادب..!!

_________________

انت بتبصلي كده ليه؟؟

________________

انا جبتلكو عسل من اللي ماما عملاه..اخدته باليل من التلاجة..انتو بقيتو مش بتحبوه؟!!

انا لسه باحبه خالص..هاكله كله لوحدي ..باي بااااااي

_________________

كل يوم كنا بنتقابل عشان نجيب ارواح و عسلية من عند عم حلمي سوا..و كنت بتجبلي ايس كريم

و نعمل بالعلبة الحمرا بقاليل صابون بعد مانخلص...انت بتكرهني؟ و لا انت كمان باباك قالك

ماتروحش عندهم تاني؟

_________________

بعد بابا ماطفي "التلفزون"باليل..انا دست عالزرار الكبير و فتحته تاني لقيت المسلسل

اللي قلتلكو عليه..يعني ايه انتو عارفين؟..طب مش بتقولولي ليه؟!!!

انا"مخمصاكوا"هاه

_________________

احسن..مافيش حد عايز يلعب معايا؟..احسن..انا هاخد كل اللعب و اطلع السطوح

هالعب لوحدي..مش عايزة حد يجي معايا..امشى..انت بالذات ماتجيش!!

________________

انا باكرهك باكرهك...مش عايزة اقعد معاك يأخي..سيبني بقي

انا هاروح..و هاقول لبابا انك خدت البلي و الشوكولاتة بتاعتي كمان..هاخليه يقول

لعمو..يضربك!

_________________

طب انا مش عايز انام دلوقتي!! انا عايزة اقعد معاكوووو.و النبي يا ماما عشان خاطري و النبي

بس خليني شوية...اوووووف اتغطيت اهو...اتخمدت خلاص!!!

______________

من وحي النكتة العبقرية الفلسفية المعقدة..العالمة بطبيعة النفس البشرية:

"لو كل اصحابي كبروا...انا هلعب مع مين؟!!!"

اللوحة:جاذبية سري