لفيت قلبي في ورقة جرنان"رداَ علي تفاصيلي المؤجلة"

انا تعبت م الصراع

وتكلفة الإختيار

والفرص البديلة..

الفرص الرذيلة..

وخيال الشُعرا..

اللي اكلهوني نيّ

أكلهوني...حيّ

تعبت من المقدمات المنطقية

والحلول الملاغية..

وفين النتايج؟؟-مجهولة

هو أنت هتجيب علي عمرك

عُمر عمولة؟؟

حاسب بقي من الخيال

وسكان مناطقه المأهولة

ولسه الفرص البديلة..رذيلة

ولسه الخيال نيّ

وكلامك-يا شاعر- جوايا حيّ

فين المشكلة؟

في البر ولا ف البحر؟؟

عارفاك..هتقوليّ السما

وتسيبني ادوّر عالبر الملاكي

ويا صاحبي..صاحبتك عبيطة

مالهاش ف كلام الأغاني

والفن اللي كله معاني

زهقت-زيي تمام-

من الحلول الوسيطة!

لأن السؤال مش واضح زي الرد

تعرف تروي السما..بالأرض؟؟

ولسه الفرص البديلة..رذيلة

ولسه الخيال نيّ

ومبدأ وجودك-ياصديقي-جوايا حيّ

عايز تشرب؟؟

ياصاحبي ده العطش سكة وصول

ونا عالسرير باموت

هاوزع عطشي لريقك عالكون

وانال شرف اسباب التصحر

يمكن الابداع الصافي ساعتها..

يتكدر؟؟

ولسه الفرص البديلة..رذيلة

ولسه الخيال نيّ

ولمس إيدك-ياصاحبي-جوايا حيّ

تعرف يعني إيه خوف؟؟

لما تمد ايدك تسلم علي حد..

وف دماغك انك هتغلط في اسمه!

أما تمشي ف محطة المترو

ماسك قلبك جوه الكتاب

ومافيش معني لوجودك ف زحمة العذاب

لأ..

عارف الخوف..

أما يجي وقت النوم..ببساطة مابنمش..

لأني لوحدي عالسرير

باترعب..لما الليل يفوت

العمر من غيرك هايموت!

آخر كلام..

خلّي بالك م الخيال

بلاش العزف..

علي أوتار المُحال

لحد مالواقع يبطل تقوقع..

والخيال..يفسحله المجال..

يظل احتمال حدوثي..مجرد احتمال!

اللوحة:زينب السجيني