كابتشينو..وحشيش..وزمالك..

اللي ماشي هناك ده عسل..بس مش لاقي حد يلحسه..تفتكري احساس جمهور الزمالك إيه بعد كل ماتش مع الأهلي؟..قبل الماتش يقولوا هنطلع رجالة وناخد موقف..بعد الماتش يطلعوا ولا حاجة..تفتكري اتعودوا علي احساس الهزيمة؟..ولا لسه عندهم امل عبيط؟..علي فكرة احنا المفروض نخش يمين..اه..طيب خلاص..شمال شمال...مين الحمار اللي قال ان السكوت علامة الرضا؟؟..طيب انا ساكتة..بس ساكتة عشان مافيش كلام ممكن يعبر عن قوة الرفض!..احنا دلوقتي في شارع حسن صبري..اللي كنا فيه يا بت في الصيف عشان حوار التدريب..تفتكري يا ياسو فين برج أم كلثوم ده؟؟..المفروض اننا هنجرب الكابتشينو في الكافيه اللي جمبه..تعرفي ان أم كلثوم كان عندها فيللا تحفة والورثة باعوها و طلع مكانها برج؟!!..السرير اتعمل عشان ماننمش عليه..لأ..عشان نصحي عليه..انتي معاكي كام؟..عشرة جنيه؟..وانا معايا خمسة..احنا القطط السمان..نحن أغنياء حرب هذا البلد..احنا اللي استفدنا من انفتاح السادات وخربناها..لسه كنت بقول لشيماء..والموبايل يستحقه اللي يقدر يقفله..طيب علي فكرة انا كنت قدام الأوبرا من ساعة..بس ماكنس معايا رصيد اكلمك..أميرة خلصت آخر دقيقة..وانتي ماتأخرتيش يعني..محدش فيكو انتو التلاتة عمره اتأخر عليا الصراحة..دايما انا اللي بتأخر عليكو..انا آسفة..كان بيسألني آه..عارفة قاللي إيه؟سألني انتي مش عايزة المادة التانية في الدستور إللي بتقول عالدين الإسلامي دين الدولة؟!قلتله لأ طبعا..أنا باشجع العلمانية..قاللي أمال لابسة الحجاب ليه؟..ابتسمت..وسكت..ثم أجبت..أصل بابا عايزني ألبسه..وانا باتخانق معاه في مواعيد محددة..باحب التايم مانجمنت..ضحك..وكانت ضحكته حلوة..السكوت علامة الرضا؟!..عشان كده اخترعوا كلمة أحه..كل البيوت القديمة اللي علي كورنيش الزمالك حتة من قلبي...وضهرك انتي دافي ناعم اتسندت ف يوم عليه..مالك شكلك مضايقة؟..وبناءا عليه...مين الحيوان ده تعرفيه؟..لأ!!..يا وسخ يابن الكلب يا حيوان!!..غور جاتك داهية!..اللي يلمسك عادي اقتله..اضحكي يا عبيطة..المعاكسة حاجة ظريفة آخر حاجة..ضحكت..يعني قلبها مال..عمري ماشفت حد بيحب عمر دياب قدك..دي مكتبة ديوان..علي فكرة انا باعشقها..مكتبة تحفة..نفسي اشتري ديوان لمحمود درويش غير كزهر اللوز..بس ماعيش فلوس..لأ..كملي..مش هاقدر ادخل لأن ده أوفر لود علي أعصابي..شفتي نايل ماكسيم؟..مرة اتعشيت فيه..مرة بس طلع ديني بعدها..وليا واحدة صاحبتي اتعشت فيه..واتخطبت بعدها..وانا بحبها..الزمالك تحفة القاهرة..وفيها روح..إلا لو طلعت تبع الجيزة ولا دقهلية هيبقي مقلب..ماهم في لحظة خلو بلد تبع بلد..عندي احساس بالقهر..خالو بيقول عليا بعمل قهوة بنت حرام..بيحب القهوة بس جاله القلب وبطل يشربها..لقد تخلي عن قهوتي اللقيطة!..علي فكرة لسه ماجاش م السفر..لأ جه..بس احنا اللي لسه ماجيناش..قصدي ماروحناش..هدي هدي..اه ه ه ه..مش بيدي..عارف انك مابتحبيش منير..بس أميرة وشيماء بيعشقوه زيي..يا ستي هايبقي كويس ارحمي نفسك..علي فكرة احنا تهنا..ونسينا الطريق..وغالبا انكسر جوانا شئ..تعرفي ده بيت عبدالحليم..كان ساكن قدام جنينة الأسماك دي..كان البنات بيجوا يكتبوله عالحيطة قدام الشقة كلمات من أغانيه..بيحبك انا عارف..بس هي مسألة وقت..اديله فرصته..الدخان ده جاي منين؟؟..وليه أزرق؟!..الدخان طول عمره ياسود يابيض..الولد اللي هناك شكله راجل..بس الدنيا سكر بره..ده افيه بتاع واحد صاحبي..عاش اللي قال عالدماغ بيلت إن..رجليا واجعاني أوي..نفسي أقعد استريح..ليه مسألناش علي أم كلثوم لحد دلوقتي؟!..هنخش شمال؟..يمين؟..خلينا ماشيين..تعبت..رجلبا بتسبلي الدين تقريبا..وجٌعت..ماعيش فلوس آكل..بس معايا أشرب..اشرب عشان انسى..ولا عشان اقسى؟!..عايزين نذاكر الميدترم قرب..ياه هو ده الكافيه؟..تفتكري الفلوس اللي معانا هتكفي ندخل؟..لأ؟..طيب..يللا نروّح.

_______________________

شعر عمر طاهر..من ديوان قهوة وشيكولاتة

اللوحة:زينب السجيني

ملحوظة بسيطة:أنا وياسمين ماخرجناش الخروجة دي لسه :)