لسه بتسأل عن العلامات؟

اليُفط في الشارع

والكلام..

اللى فجأة طالع

من اتنين ماشيين ورايا

ماحدش فيهم شبهى

ولا أنا شبه حد..

وأول كلمة قالها حد

ف يوم حد

كان بيجرى تحت البلكونة

متأخر و قلبه والع

وأغنية لمنير تتغنى صدفة

بس قاصد المقاطع

ولمّا ماتردش

فالقى مافيش بُنْ

والقى النور قاطع

ولما أروح الحى السابع

فالقى ف وشي اسم الشارع:

"باب الوداع"

فابكى بالدموع

واروّح..

ألقاك راجع

قولّى..

بتعمل إيه قبل ماتنام

فتصحى عندك القدرة

إنك تتحدى العلامات دى

كُلَّها؟؟!