RSS Feed
و أنا..أنا..لا شيء آخر

Tuesday, May 01, 2007

عم بطاطا لذييييذ و معسسسسسل!

كالعادة..تحذير لا يمكن تخطيه:البوست طويييييل فعلا المرة دي :)
كان يدخن الشيشة القص من المقهي القريب..ويسب الصبي الجديد في بكارة امه لأن الشيشة "مهوّية" علي حد قوله،ثم لمح صديقاً له ياتي من بعيد..فنده عليه ب..يابن القحبة-كما يصر معظم الكتاب الشباب علي كتابتها-واستدعي كرسيا ..في ثوانٍ كان يعبر الطريق في يد صبي المقهي الجديد..جلس صديقه الذي اعتاد علي ثرثرة العجوز بائع البطاطا..عن البنت التي..:
"ياخويا أنا هنا بقالي كتير أوي..عارف الناس كلها..وعارف اللي ساكن في الحارة من اللي ساكن في الشارع..مايغركش الظاهر..ولا تعشم في الباطن..ماعدتش بحسب السنين..مزروع عالناصية من أيام "لنجليز"..شبت..وبقيت بكح م المعسل..والنبي ماكانت الجوزة بتسيب إيدي..وهيّ كبرت..وأحلّوت..البنت أم ضفيرتين الصغيّرة..كانت تتخانق مع أمها وتقول "بلاش الضفيرتين يا ماما والفرق اللي في النٌص زي المعيز ده"..أمّا كبرت حبة..كانت تخطي قدامي بجونلة المدرسة الكحلي..وشايلة الشنطة البلوة علي ضهرها..والنبي كان باين عليها الشطارة..مع حدفة القصة عالجنب..والبت تحاول تتدلع..وماتعرفش..ماكنتش عمرها تضم الكتب علي صدرها زي بقية البنات..أمّا خرطها خرّاط البنات و دوّر صدرها بقيت أشوفه عايز يطير من تحت القميص زي جوز الحمام الأبيض..البت أحلوّت ياخويا من هنا..والعيال الخولات بتوع التجاري فاكرينها بتاعتهم..كنت أسمعهم بيراهنوا عليها ولاد الوسخة كنت باشخط فيهم وباسبلبهم كل يوم ف معاد رجوعها م المدرسة..ومش ملكي ياخويا..الشارع ملك الحكومة..الحكومة الوسخة اللي موريانا الويل ومسففانا المٌر..ودين النبي ماتفرق عن الكوبانية بتاعة لنجليز.
يقاطعه الرجل الصديق الذي أمتلأت رأسه بالحواديت..ويطالبه بالحاجة الساقعة..فينادي علي الصبي الجديد-باسم أمه الآنسة-ويكمل:
من ساعة ماقفل بيّاع الفاكهة اللي كان علي ناصية الشارع اللي ساكنة فيه..لا حد يغازلها ولايعاير بيها الفاكهة..من اربع خمس سنين..والفاكهة بارت قدامها..الراجل كان صاحبي وكان غاويها..اسمعه يقولها:"يا بت يا بتاعة السياسة..تقولي إيه ف عبد الناصر؟ فتقوله:اشتراهم..والسادات؟باعهم...ومبارك؟عمّال يشتري ويبيع فيهم..وتضحك ضحكتها الحلوة..وتقوله:بس أنا إقتصاد يا سيدي مش سياسة..وتسيبه وتمشي.
عدت السنين..وكنت اسمعها تكره الست..ولاتطيقش تسمعها..من كام يوم كانت ماشية تغني"ونقول للشمس..تعالي تعالي..بعد سنة..مش قبل سنة"..تكونش عشقت لها واحد؟..والنبي البت صغيرة ويضحك عليها..وسكره ويطمع فيها..إلا ايه ياخويا اللي ماسكاه في ايدها ليل نهار وعماله تكلم فيه؟ده زي التَلَفون؟والنبي صحيح؟؟!..عشنا وشفنا..من غير سلك؟..طول ماهي معدية تكلم فيه ولا تعبّر البطاطا..وعينيها سهّمت..وتغني ف الشارع مرة..وتبكي عشرة..لايكون الواد مزعلها..دي طيبة وعشرية وتستاهل كل خير..لو عندي ابن ينفعلها كنت جوزتهاله..انما ابن الكلب سابني وراح اتجوز واحدة قد امه ومخليها تصرف عليه زي المَرَة..وسابني لعجزي..ماقدرش أخش الحمام ف البيت..اخشه ف الجامع اللي ورانا عشان الاقي حد يسندني.
يتملل الرجل بعد انتهاء الحاجة الساقعة..وتعلن مقعدته تمردها الأبدي علي الجلسة المؤلمة علي الكرسي الخشبي..فيستأذن للذهاب للحمام في الجامع القريب..ويعده بائع البطاطا ببيرة ساقعة و"جوز سندوشات" من عند عربية سيد الجارية زميل الكفاح..يطمع الرجل في الوجبة الخمس نجوم..فيذهب للحمام ويعود سريعا..ومع أول قضمة من "السندوش" الأول..:
لا صحيح..شكلها بتحب..ومتعذبة كمان في الحب..شكلها مش مرتاح وعينيها قلقانة..اللي عمري ماشفتها ياخويا ماسكة ف إيد حد..ولا ماشية مع راجل ملو هدومه كده...يا حبة عيني من كام يوم شفتها كانت ضامّة الكتب علي صدرها-عمرها ماعملتها-وعينيها متغرقة دموع..واتكعبلت في طرف الرصيف وماقدرتش أقوملها...قلبي أتمزع عليها وهي بتلم نفسها وبتنزل الجونلة علي الجرح..الجرح اللي ف رجلها الشمال..
نفسي أعملها حاجة..نفسي أريحها..انا قلت لنفسي لو في حاجة أقدر اعملها مانتأخرش أبدا..بس ولاد الكلب بتوع التأمين يدوني العلاج..لا تأمين مريّح ولا معاشات مريّح..ولاد الكلب هياكلوني حى وميت..اللي ماهان عليهم يزودوا المعاش شلن..والعيش غلي بقي بربع جنيه..والنبي باجيبه ياخويا مابقدر احطه ف بقي..لو قطمته هايطلع بطقم السنان اللي ماحلتيش غيره.
انت عارف..أنا هاستريح لو اتسترت قبل ماموت..نفسي اشوفها مبسوطة..بقالها كتير أوي مكسورة..أصل النجاح ف الدنيا مش كل حاجة..الواحد يحب الوَنَس ويدوّر عليه..والبني آدم مننا مالوش غير بيته ومراته..والست مالهاش غير جوزها..يعني هي لفت ودارت وراحت وجت..وبقت سفيرة ولا وزيرة..مش عايزة تروّح باليل تنام في حضن حد؟..ولاّ عايزة حد يدلعها ويناغشها ويلبسها ويقلعها؟..وترمي الحِمل عليه شوية؟..سمعتها مرة بتقول لصاحبتها انها بتحبه أكتر م "الفسكافيه"و"التفاح"..التفاح واشتريناه أيام العز..وبعناه من كام يوم..ايه ميتين أم "الفسكافيه"ده؟؟أنا سمعتها بتتخانق مع امها مرة أن "المرطبان" مافهوش معلقة..حاجة بتتشرب؟..ودين النبي؟؟..زي القهوة كده؟..أنا عشت ولفيت وطفت..وكل قهاوي مصر انا قعدت عليها..المحطة و محطة الرمل والبورسعيدية والخّيالة والندوة..ويوووه يوووه..ماتعدش..عمر معدي عليا بوز أمه..انما يموت المعلم ولم يتعلم..معلش يا دنيا.
ينتهي الرجل من غدائه وبيرته واتنين شاي بحليب وواحد حلبة حصى وتلاتة قص..ويخيم الظلام علي الحارة التي يجلسان علي ناصيتها..فيعلن أن ميعاد العشاء أقترب ولابد أن يذهب..يحاول العجوز ان يستبقيه بعروض من نوعية شاي ف الخمسينة وقهوة محوّجة..فلا يستطيع...ألمحهما من علي البعد..أبتسم لمرأي العجوز يراني فيترك الرجل ليذهب سريعاً..فيستغرب -الرجل- تصرفه ويمضي مسرعاً منتشياً بالإفراج عنه..أقترب من بائع البطاطا..ألمح عينيه معلقةُ بإيقاع خطوتي..أعرف أنه قد أطفأ فرن البطاطا الآن..ولكنني أمد يدي الي الحقيبة لأخرج النقود..وانا موقنة..من أنه سيعطيني"بجنيه بس؟.. مولعة وملهلبة و معسسسسسلة ياااا بطاااااطاااا!!"

23 comments:

منى said...

دا أنتي اللي معسلة وملهلبة يا قمر ، أيه يا بنتي الجمال ده كله ، أنتي مش هتنشري رواية والا مجموعة قصصي قريب بقى عشان نستمتع بكتابتك بجد
:)
منى

FrEe.PhArAoH said...

جمييييييل

بجد جميل يا وئام .. مش عارف كنت ساعات بخمن اللى بيكتب من روحة اللى باينه فبصمته على كلماته
كنت بعرفه ولد او بنت متفائل او متشائم مثلا
معاكى مش عارف اكنى بتفرج على فيلم بكل تفاصيلة .. لو قلتلك موهوبة بس ابقا بظلمك

تحيااااتى

عوليس said...

معسله يا بطاطا

تسـنيم said...

روحي يا شيخة ربنا يسامحك.. إييه ده يا بت.. كنتي بتتكلمي كما لو كنتي الراجل العجووز ده بالظبط، نقلتيلي إحساس انك الراجل اللي لف ودار واتمرمط ومعدش وراه حاجة غير ياخد باله من اللي رايحة وجاية وكمان شايل همها ونفسه يسترها كما لو كانت حتة منه.. اتكلمتي بسوقيته وجهله وأسلوبه الخام الذي لم تغيره أبجديات المدارس وطرابيش الخوجات.. واتكلمتي بلوعته وحسرته على الإبن اللي خيب أمله وكان فاكره هيطلع راجل طلع حاجة تانية..

ولمستيني أووي لما قلتي : نفسي اشوفها مبسوطة..بقالها كتير أوي مكسورة..أصل النجاح ف الدنيا مش كل حاجة..الواحد يحب الوَنَس ويدوّر عليه ..والست مالهاش غير جوزها..يعني هي لفت ودارت وراحت وجت..وبقت سفيرة ولا وزيرة..مش عايزة تروّح باليل تنام في حضن حد؟

ياااه يا بت يا وئة.. مش كلهم يعرفوا كده.


يخرب مطنك يا شيخة

أحمد said...

ياما نفسي اشوفك متستته في بيت عدلك ، ف حضن الراجل اللي كان نفسك تحضنيه ف الشارع عشان تبقي متسقة مع نفسك
:DDDDD
أحمد

Amira Hassan said...

مش لاقيه تعليق مناسب


محترفة يا بنتي

محترفة و الله

Baher said...
This comment has been removed by the author.
Baher said...

يعنى نسكافية وتفاح اخضر وبطاطا بلوج دة والا مطعم
مش عارف اقولك اية المرة دى... حلوة
مش كفاية .. حلوة قوى .. برضة مش كفاية ... ياريت فيه حاجة فى القاموس معناها حلوة مليون مرة كنت كتبتها... بس انا شامم ريحة بطاطا هاتتحرق فى الموضوع ولازم اعرف حكايتها .. وعلى فكرة ابقى عدى ع البلوج بتاعى سايبلك فية حاجة حلوة
سلام يا بودى

LAMIA MAHMOUD said...

عارفة يا بت يا وئام مش عارفة اقول حاجة

كل اللي حعرف اقوله اني محسيتش انه طويل

خالص يعني


ومعرفش ليه كنت بحاول مدمعش مع انه مفيهوش حاجة تدمع
ولا فيه؟!
يووووووه

مش عارفة اقولك حاجة .. ولا انا قلت؟

Abd El Rahman said...

بنت يا وئام

ملعون ابو اللي يقول انك مش هتوصلي وتبقي أديبة بنت لذين وهتتنططي على خلق الله وهيفضل قلبك - لامؤاخذة - زي ما هو

جامدة والله يا وئام ويلعن تلاتة ابو وام جنون كتابتك

وبس خلاص

ody911 said...

لاء بجد كملتها للآخر


مقدرتش أشيل عينى من على السطووور


كلامك بجد تحفة

والحكاية جميلة

وأقولك إيه طووول عمرك مبدعة

وعادى بقة
أودى

iHaB said...

عموماً هايلة ..لغة بياع البطاطا مفتعلة شوية ..عايز اقول ان كلامه شبه انه مكتوب اكتر منه كلام بيتقال
ولا ايه ؟

elkamhawi said...

.فيذهب للحمام ويعود سريع
بقى كبرى الخط شوية بتعب صدقينى

nour said...

:||||||||||||||||||||||
انا مصدومه
انا حاسه انى مبقتش عارفاكى
انا عايزة اشوووفك
بجد
عبد الرحمن عنده حق
يخرب بيت كده
الناس كلها بقت بتنزل كتب حتى اللى مش موهوبين
هتنزلى كتابك امتى بقى؟؟؟
على فكرة انا لو صممتلك على حاجة حتحصل
و شكلى هحطك فى دماغى:))

we2am said...

لظروف خارجة عن الارادة..تتعلق بسفر وبيت خالو..وزيارة مفاجئة يوم الاتنين..هارد عالكومنتس بدرييييييي :D

في البدء..
مني
يا مني..الاحساس اللي انا كنت خايفة منه حصل..عندي هاجس بيقول اننا بنتقابل بس مابعرفكيش.. ؟


فري فاروه
ده كلام كبيير..انت كده بتقول اني قدرت اطلع من محيطي وشخصيتي ونوعي وثقافتي..وباكتب رغم كده كويس!!!
ربنا يجبر بخاطرك..


عوليس
شكرا..ولو اني كنت عايزة رايك في الكتابة..


تتووووتة
مبدئيا انا تعبت وانا بقري الكومنت بتاعك..بجد الواحد منتهي امله وهو بيكتب ان يلاقي حد بيقري بحماس واحساس وتدقيق كده..انتي حد قارئ مش عادي :)
فكره الراجل العجوز عموما بتأرق اي حد بيكتب..وهمومه الغامضة اللي مرسومه في تجاعيد وشه وضحكته المخوخة وعينيه اللي دايما مرغرغة بالدموع من غير سبب..
الايام دي انا عندي هاجس النوم في حضن حد-من غير ماتفهميني غلط لحسن عارفه دماغك-فكرة اني باليل بيجيلي أرق فظيع..لأن المفروض فيه حد يتنام في حضنه في الظروف اللي زي دي و مش موجود..دي مأساة اغريقية اصلا..حاجة وسخة :))
بس ياستي..انا رغيت معاكي زي مانكون عالمسنجر :))))



أحمد
من بقك لباب الأوضة..علي رأي واحد صاحبي أنت ماتعرفوش..


امييييرة
واحشاني اوي يا اميرة وعايزة اشوفك وننم..وعندي امتحانات وحاجة وسخة..لازم نحاول نضبط :)
يابنتي احنا ناس معدية..عيب عليكي :))))


باهر
لاتتحرق ولا تنشف يا عم..اهي ماشية رضا الحمدلله..احنا كنا فيييين وبقينا فين؟! :D
انما هاعدي عالبلوج لو لقيت وقت حالا :)


لاميا
يا حبيبتي انتي لو ماكلمتيش اصلا وماحطتيش كومنت وماقريتيش البوست اصلا..هتقولي..وانا هفهم اللي انتي هتقوليه :)))
اهم حاجة انك عرفتي ماتدمعيش..ولا دمعتي؟؟


عبدالرحمن
والله انت كده مدلعني جدا جدا...
وكلامك علي عيني و راسي..ادعيلي بس اني اكمل..واني مابدأأش افكر في جدوي الكتابة :))


أودي
ربنا يجبر بخاطرك..اهم حاجة موضوع الملل..انك اول ماتلاقيه طويل تخلع كده..ربنا يستر طريقك :)))


ihab
والله ممكن..علي أساس انس مش بقعد مع بياعين البطاطا..علي العموم اعتز باختلاف رايك..اهي محاولة..والمرة الجاية انشاءالله احسن :)
منورنا :)

القمحاوي
ماتكبره انت من عندك!
انا مابحبش الخط الكبير :P


نووورااا
طب انتي عارفه انا عايزاكي تصميملي علي ايه..والنبي صممي علي كده يا شيخة لحسن هاتجنن!! :D
شكرا شكرا..بس انا لسه مصرة علي هاشم كل الناس اللي مش موهوبين بينزلوا كتب ومن عند ميريت! :D
حلو حلو..انشاءالله هنشوف بعض قريبا جدا
coming soon :D

iHaB said...

ده نورك :]
الموضوع مالوش علاقة ببياعين البطاطا تحديداً..اعتقد ان لغة عم بطاطا كانت مفتعلة ..حتى لو كان بيشتغل سواق توك توك :)..
على فكرة ..وصولك للغة بياع البطاطا او غيره كان هيبقى ابداع تانى .ومش لازم تقعدى مع بياعين البطاطا عشان تعرفى لغتهم ..هو ده سبب إن الكتابة ...مقدسة
مش كده؟ ..اكيد المرة الجاية هتبقى احسن ..ولا ايه ؟

elkamhawi said...

بكسل

koko said...

بالرغم ان كلهم قالوا انها حلوة وحلوة قوى الا انى لقيت انك هربت من المواجهة وقلت اللى نفسك فيه من غير ما تقولى حاجة

بتستخبى يا وؤام فى الراجل العجوز؟

لكن بصراحة هو دة اللى حصل فعلا
البنت اتجرحت بس .................. مش رجلها الشمال
وصحيح اشتارونا وباعونا

لكن المهم عاجبنى اسلوبك بجد
بالرغم من انك ممكن تقولى اكثر من كده كمان

تسـنيم said...

مأساتك الاغريقية دي هيا منتهى عذابي ولعلمك بتبقى اصعب اوووي لما تكوني مهيأة نفسك ان بطلك الاغريقي شخص معين وكل يوم بتنامي بعمق وفجأة تصحي وتكتشفي إن القصة خلصت والبطل سرقوه منك بالرغم من اعتراضه... وكل لياليكي أرق في أرق لأنك مش قادرة تضحكي على نفسك وتستعيدي صورة فارسك المغوااااار وتعرفي تنامي ومش قادرة تقتلي الاشتياق اللي كل ليلة بيفترسك :(((

بياترتس said...

هههههههههههه
حلوه

frozen love said...

eh el7lawa de ya bet...asebek shhr we arg3 lelblogs tany ala2eky btktby kda

esm7ely a2lk eny fe aktr mn part impressed me ..we gamden akhr 7aga...nice work

أحمد ندا said...

إجرام

makhlouf said...

فعلا مولعة وملهلبة و معسسسسسلة

مكتوب كويس اوى والجمل متقطعة كويس اوى برافو والله
استمتعت بيها فعلا