RSS Feed
و أنا..أنا..لا شيء آخر

Tuesday, November 18, 2008

سِكَّة




ويرجُّكْ السؤال..مع رجًّة السكّة الحديد..
(إيه يا بكره؟..وبعدين؟)
ألمِسْ سواد الكتابة..ببياض العين
أحِسًّك جوا الكلام..
نبضْ قلبَك في السطور..
في شكل الحروف..
فوق النقط..محفور
ع البُعد..نورَك..
يختفي..
مابين لحظة الصمت..
ولحظة الندا عالميت..
ووقفة علي السور الحديد
والدراعات مفرودين..
جواك فيه خلايق كتير..
محشورين..
عمر الكلام ماكان حسنة..
قدام الحنين
ولا الصدق منجي..
من الدمعة إياها..
الكدب اتعمل للحيرانين..
وانت عينيك متحيرة..
و حزينة..
و عارفين.
لأ مش طيبين..
بارتاح لهم أنا..
ولسه معرفتش..
قابلتك إمتي..
وإزاي ، و فين؟
إمبارح؟
ولاّ
بعد ماتولدت بحبة صغيرين؟؟
كل اللي أعرفه..
إن القعدة..
علي كرسي المحطة..
بتعمل بني آدمين..

9 comments:

Anonymous said...

يا عم أنا إيه اللي جابني هنا؟ أنا ماشي يابه ، رايح أربي العيال .. أوعى إيدك يا عم عشان ماولعش بيك سيجارتي .. شيلي الناس اللي إنتي موقفاهم دول يا وئام

لسة هتقولي سكة حديد و أنتخة كرسي المحطة؟ و ناس رايحة و ناس جاية و ناس..تايهة؟ هتسحبيني سنين ورا ، أيام الصياعة و مزاولة خلق الله اللي نازلين من القطر و اللي طالعينه و طبعا اللي متشعلقين .. محطة القطر محطة ، و الدنيا برضه محطة ، بس مافيش حد بيقطع لحد تذاكر

لكن عارفة؟ إنتي صح ، الخلايق دي مش محشورة في القطر ، الخلايق دي محشورة فيَّه ، و فيكي ، و في كل واحد ساب ,,السكة،، بتاعته لحظة و دوَّر بعينيه على باقي الناس .. قصيدة رائعة بكل المقاييس ، لكن من كتر ما دوَّرنا ، عينينا كلنا بقيت متحيرة ، و حزينة ، و مش طيبين

كل واحد فينا في يوم هيبقى واحد من الركاب أو المتشعلقين ، و هيتخانق مع الأمن بتاعك يا وئام عشان يمشي و يلحق يربي العيال ، و هيُجزم إن القعدة على كرسي المحطة بتعمل وجع في العمود الفقري


N

we2am said...

N
أحيه يا بو سوسو أحيه!
بنتك هاتفتح و انت هاتمّز يا بو سوسو!
:D
يا عم "العيال كبرت"!
:D
يا عم أنا مش موقفه حد، اللي عايز يروح يروح،ده طبعاً غير إن اللى يفكس يروح
:)
أكيد ماحدش معاه فلوس بزيادة يدفع لحد تذاكر، المفروض كل واحد يكفي نفسه، خصوصاً إن أحياناً القطر بيبقى محافظات، وأحياناً أخرى مراكز، وده بيفرق فى سعر التذكرة
:)
يمكن أنا كنت أقصد إن الخلايق محشورة جوانا، بس انت طبعاً من حقك تفهم اللي يريحك و يلّد عليك،بس الفكرة إنك ماينفعش تسيب سكتك و تبص عالناس، ولا تقفش ف سكتك و تنفض للناس،
مش "بردو الناس للناس؟!"
لازم الإتنين يبقوا بالتوازي زي القضبان بتاعة السكة الحديد، و تحافظ على نقطة الزيت اللى جواك
:)
أكيد الحياة مليانة سكك و محطات و شايلة لنا حكايات و ناس كتير مانعرفش عنهم حاجة،ده الواحد لسه بيستفتح
:)
و خالص يا معلم،أنا عندي تتخانق مع الأمن عشان تدخل، مش عشان تطلع، الطلوع عندى مش طلوع روح، ده شعرة من عجين :)
و بعدين عمودك الفقري بيوجعك أو عندك بواسير:
ماتقعدش عالقلاب!
:)
منور
:)

ابن المليونير said...

(إيه يا بكره؟..وبعدين؟)

هتبقى لأبويا ولا ليا
هتبقى للأخلاق و المثالية ولا للمادية و الإنتهازية
مودينى على فين
طول اليوم فلوس فلوس و بعدين
مش الفلوس دى اللى انت خنتنى معاها فى صغرى
و لسة بتخونى وقدام عينى ويمكن بشاركك
اية قيمتى او اية حدودى غير حدود الكرسى بتاع المحطة
مستنى متكتف يمكن بكرة حد يجى و يعبرنى و يبصلى بحنية و ينهضنى
أو يمكن احاول اقوم و اشارك الناس احزانهم و افراحهم و خبطاتهم
القعدة على كرسى المحطة يا ابنى بتعمل بنى ادمين بس عجزة و مشلوليين
يمكن متفهمنيش يا والدى و حتى لو فهمتنى هفضل انا مش فاهم نفسى

we2am said...

ابن المليونير
يمكن كنت هاسيبك تكمل المونولوج النفسي ده ،للآخر
بس لفت نظري حاجتين
أولاً:إن الناس فاهمة القعدة على كرسي المحطة بطرق مختلفة،و دي حاجة كويسة جداً،علي أساس إن الإختلاف في الرأى لا يفسد للود قضية
:)
ثانياً:إنك اكيد هاتفضل بالمنظر ده مش فاهم نفسك
:)
منور
:)

ابن المليونير said...

استاذة وئام
لية حضرتك بتقولى انى اكيد بالمنظر دة هفضل مش فاهم نفسى؟؟
انا لما قلت انى مش فاهم نفسى كنت اقصد انى مش فاهم اية اللى مخلينى لسة قاعد على كرسى المحطة وامتى هتحرك؟
تحياتى

Oma said...

ana ma3al2tsh ah
bs msh shan ma2aretsh aw msh la2ya klam
bs shan enty dosti awy
7ta 3la elFB msh radit m3 enk 3mltli tag
bs bgd sa3b arod 3la de belzaat !

we2am said...

ابن المليونير
ماهو ده معناه إنك مش فاهم نفسك بردو
:)
مش عارف إنت عايز تروح فين و لمين و تعمل إيه
:)
تحياتي

omaaa
klamk weslly ya mozza mn 3'er mat2oleha..mnwrny 7ta mn 3'er kalam :)

Mony The Angel said...

كل اللي أعرفه..
إن القعدة..
علي كرسي المحطة..
بتعمل بني آدمين..

7elwa aweeeeeeeee :thumb:

we2am said...

monyyyy
fenek ya bnty??welcome back :)
thunk you thunk you :)