RSS Feed
و أنا..أنا..لا شيء آخر

Thursday, February 01, 2007

تلاتة تاج مرة واحدة! يا نهار ازرق!

يا صباح الورد ..
الناس هنا طلعوا بيعزوني وانا مش واخدة بالي..تلاتة تاج مرة واحدة؟..كتير علينا كده!!..ده غير ان ذكاؤهم السرمدي..خلا التلاتة تاج عبارة عن نفس التاج عدا واحد مختلف! :)
والله ممنونة اوي يا حفصتوشا..و يا مصري..ويا مانو(التاج بتاعها غير برضك) و انشاءالله نردهالكوا في تاج علي امتحانات التيرم! :)
و بهذه المناسبت الساإيد..شوفوا بلوج هو وهي احسنلكوا :)
وايه كمان..ايه كمان؟..ولاحاجة..الي التاج مباشرة!
اية اللي حيحصل لايميلك لما تموت ؟
والله اكيد وسام او وليد اخواتي هايخشوا عليه..لانهم الاتنين عارفين الباسوورد..ومش هايسبوكوا في حالكوا ساعتها..البنات تاخد ساتر :)
اديت الباس وورد لحد قبل كده؟
اه طبعا..
لو اه كانت طبيعة علاقتك بيه اية؟
صديقي صديقي يعني..وخبرة كمبيوتر غريبة..انا بقول عليه مبرمج بالفطرة! :)
اسمك؟
وئام.هو في احلي ولا اروع من كده؟ :)
اسم الدلع المشهور في وسط اصحابك؟
والله الاسم الدلع الرسمي..بودي..انما بما ان اسمي خلاق..فكل حد بيخترع اسم دلع لوحده..حتي وان كان مالوش علاقة باسمي..زي توتة مثلا..ده ايه علاقته بوئام والنبي؟ :)
عمرك؟
انا عندي تمنتاشر سنة و 4 شهور و يومين و نٌص
:)
برجك؟
الميزان..مواليد شهر اكتوبر طبعا..احنا اللي بدعنا العظمة..العامة يمتنعون :)
مجالك او مجال دراستك ؟
انا بدرس الاقتصاد في كلية سياسة واقتصاد..وباشتغل حبة في الصحافة و مهتمة حبة بالكتابة والادب..الطبيعي اني اتابع اللي بيحصل في بلدي..ولهذا كان قول صلا ح جاهين العبقري"ماليش كتير في الكلام..لكن باعبر..وماليش كتير في السياسة..لكن بافكر"
شخصيتك نوعها اية؟
والله في ناس -عدد لا باس به- بيقولوا عليا عنيدة و دماغي وسخة..في حين اني شايفة اني طيبة و حنينة والنعمة..انما انا باحب التفكير المنطقي زي عنيا..والمقدمات اللي تليها النتائج..ده غير اني احيانا بيجيلي مود غريب كده..ماعرفش عامل ازاي عشان محدش يسأل..اصحابي عارفينه..ويجي حد يقولي اني باحب اللامنطق واني باموت في المفاجأت..والله..شوية :)
اي حد يعرفني عايز يضيف يتفضل..
السفر بالنسبة لك؟
انا بعشق السفر..بس مايكونش هجرة.بمعني نسافر نشتغل ونيجي..نتفسح ونيجي..يعني ممكن اعيش بره الميه..بس مش كتير..زي السمك البلطي :)
المود بتاعك؟
عامة..انا بضحك وباهزر كتير..ويمكن الجد بتاعي قليل..انما ده مايمنعش اني احيانا باقلب..
وقت فراغك بتعمل فيه اية؟
كتب كتيييييييييير وجرايد....قراية و احيانا كتابة..اخرج اشوف اصحابي لو مسموح..اقعد عاكومبيوتر اسمع مزيكا باحبها و اشوف البلوجز..اكيد ملاحظين اني مش باجي كتير زي الاول..وده لان وقت فراغي منعدم الايام دي..غير طبعا ان طارق ابن ملاديع الكلب فاصل النت الدي اس ال..وباجي دايل اب :)
الاكلة المفضلة؟
البيض بجميع انواعه..(حتي لو عملتهولك باكلاب هاتكليه..علي رأي ماما)و الفراااااااااااخ..باعشقها..والبطاطس كمان..عامة انا ليا مزاج في الاكل..مش باكل اي حاجة او اي طبيخ..
الصفات اللي خدتها من بابا؟
انا شبه بابا شكلا..و منظمة و محنتفة زيه..وباهتم بشكلي و بتناسق الالوان و الهدوم زيه برضك..تقريبا بس :)
الصفات اللي خدتها من ماما؟
اييووووه يا جدعااااان..كتير..ماما هيا العامل الاول والمؤثر في تربيتي اصلا..وانا دماغي شبهها الي حد ما..بافكر كتير زيها و بقرا كتير..متابعة للاحداث و التطور في اي مجال زيها برضك..شوية شغل بيت كده علي خفيف..لان ماما ماشاءالله فنانة في البيت والاكل..كمان الاهتمام بالشكل والمظهر المحترم.. بحاول ان يبقي ابن الوز عوام :)
اكتر 6 حاجات بتكرهها؟
الشاي..اللي يمنع نفسه عن حاجة بيحبها لاي سبب بعيدا عن ان نفسه تمنعه..خلط الامور والاتجار بالدين بمعني ان ندخل الدين في اي حاجة في اي حتة..الاغاني والافلام والناس البيئة..حد بيحبني وانا باكرهه والعكس..اكون حاسة او عايزة اكتب حاجة ومعرفش اطلعها..العجز بمعني ادق
اكتر 6 حاجات بتحبها؟
النسكافبه والقهوة..الشيشة..المود اللي قلته هنا..خروجة جامدة مع ناس بحبها ومكان بحبه..وجود ماما في حياتي..احساسي ان النهارده بتاعي وان ربنا بيحبني :)
الشغل بالنسبة لك؟
حاجة اساسية طبعا..لان البنت في مجتمعنا الشرقي الذكوري المتعفن-علي رأي نوال السعداوي-ما بتحصلش علي حريتها الا بالشغل والفلوس..بمعني.انه كما تعني الحرية لك..يعني لي العمل :)
اية الكومبيوتر والانترنت بالنسبة لك؟
والله اختراع كويس و بينجز وقت كتير-علي الرغم من ضياع الوقت احيانا-ووسيلة ارخص للتواصل والحصول علي معلومات كتير جدا..علي الرغم من التفاهات وسرقة الوقت.. الا ان في ايام بيجيلي انسحاب-من اعراض الادمان- اما ابعد عن الانترنت فترة :)
خلص تاج مصري و حفصتوشا ومانو
مانو بقي باعتالي اتنين..
التاني بيقول:
الخمس حاجات اللي ماحدش يعرفها عني هي؟
انا انسانة واضحة و صريحة وشفافة-ثلاثية اللي مش هامه- وتقريبا كل الناس عارفة عني كل حاجة :)
انما..ممم..لنر
-كتير اوي باحتاج لحد باحبه و بيحبني ياخدني في حضنه ويطبطب عليا
-اني باشرب شيشة وسجاير :)
-عندي مساحة مرعبة من التساؤلات ممكن تدخل بالنقاش في مناطق خطيرة :)
باحب سارة فوق ماتتخيل..وهي مش بتحبني بنفس القدر..او مش مهتمة باظهار الحب ده الله اعلم..تقريبا انا اللي اوفر هنا- :)
-تقريبا كده والله اعلم..شكلي هاحب حد..ربنا يستر..لاني بخاف جدا..خوف مرضي يعني..وياسلام لو ماطلعش بيحبني وانا بحبه..هتبقي مأساة اغريقية..ايا كان..في انتظار الايام تحن علينا وتثبت اي حاجة :)
جمييييل..خلصنا التاجات..كل مرة وانتوا طيبين..نحب نمرر القصص دي لمين بقي؟..تقريبا كل البلوجرز عملوه..ياللا
باسم شرف
مخلوف
نور..ماتيجي نرقص
شيماء ..ماشي بدون قدم
لميا..ولو عملتيه طنشي :)
اميرة حسن..يابت عايزة اشوفك يا بت :)
احمد بيه الهواري..ديد مان (بعد الشر)0
يللا بالهنا والشفا :)

23 comments:

mano said...

شخصيتك عجبانى يا بنتى
بتفكرينى بنفسى ساعات
بس انت لسه صغيره على السجاير
صحتك

تحياتى

مصرى said...

يادي الفضيحة أما جلاجل يادي الجرسة أم حناجل

إييييييه مش قلتلك التاج علينا حق
أحلى حاجة في التاج إن الواحد بيسيح لنفسه و هو عارف إنه بيسيح لنفسه

بس إجاباتك حلوة يا وئام
بس وئام بقت بودي إزاي

:D

مصطفيتش ابن حفصوتشا said...

مش فاهم جيبتى الاغانى والافلام والناس البيئة فى جملة واحدة مع بعض ليه من ضمن الحاجات اللى بتكرهيها

باقى الاجابات اشطات

Diyaa' said...

!!

LAMIA MAHMOUD said...

اه واحد جالي والتاني لاء
حعمل التاني من عينيا

صفصف لادي said...

لووووووووووول
اجاباتك عسل يا وؤووم بجد تحفة و بتحببيني فيكي بزيادة

سلام

No Fear said...

السلام عليكم
تاج جميل بس حاولي بلاش موضوع السجاير و الشيشة هترجعي تندمي في وقت مش هينفعك فيه الندم
علي فكرة أنا بشرب شيشة بس بجد شئ وحش جدا و خصوصا أنك كمان بنت هتقأثر فيكي قوي
نصيحة لله
سلام

إنـســانة said...

بصى يا بودى
انا اشفقت عليكى عشان انتى من طلبة الكلية الخنقة بتاعتنا
FEPS FEPS
تحيا
FEPS
واستغربت من موضوع السجاير والشيشة ده .. بس لما عرفت إنك كمان قسم إقتصاد زى حلاتى صوعبتى عليا اوىىىى
وعرفت سبب الحاجات دى كلها
هههههههههههههههه
والله يابنتى بنطلع من المحاضرة واحدة من صحابى تصووووووت
خلااااااااص مش قااااااادرة انا عايزة اشرب سجااااير اتخنقت من ام الكلية دى بقا
هههههههههههههههههه

بس نصيحة اخوانانية بلاش يابنتى صحتك
كح كح كح
وبعدين ابقى اشربيها برة المدونة الدخان ملاى النت كله بقا

وربنا يسترررررر

ody911 said...

أولا مساء الخيير

سجارة يا جميل

ثانيا
أنا زعلت قوى لما قلتى إنك مش بتحبى الناس البيئة

طيب وأحنا نروح فين ؟؟ (:

ثالثا ودة الاهم

أنا بعتلك التاج دة برضوا

يالله
أهو كلو برتقال

وعادى بقة
أودى

FemTo said...

صريحة وديه اهم حاجة شايفها فلازم تبقى فى البنى ادم..والتدخين ضار جدا بالصحة:)

Abd El Rahman said...

يعني توته اللي ملوش علاقة وبودي ليه علاقة ؟

frozen love said...

lessa 3aml nfs eltag...lol
ma 2ltlk fkk mnny..ana geet nwrt elbeet...

frozen love said...

2la 2olely...hwa s7e7 ezay 7d bey2lk ya tota..eh elghraba de..da mlosh 3laka khals b2smk...looooooool

Epitaph said...

looool

bosy ya Tota :D eh ya 3am 7'amsa sara7a di lol

bel shefa el tag 7adretek :D

Chavazelle said...

Kowyess ennik betfakkare ya bent. Sa3at - sa3at keteer - bened5ul el donia, nata3amaq feeha, you know break into the routes of life, le7ad manensa e7na gena menen at the 1st place. Something keda like foqdan el haweyya. Beygelna wa2t yeb2a akl el 3aish malee el sura udamna, mush shayfeen 3'ero. Tafkeer ay mowaten a2akel 3eyali walla afakkar el donia mashya 3'alat wala sa7. Mush muhem el donia tewla3, bass 3eyali maymotush mel gou3. Tafkeer yabdo in most of its aspect, manteqi. Bass faked .. mostana3. En el nass teb2a 3agza 3n el tafkeer ella fe akl el 3aish, aham sela7 fe eid el nezam ye7fazlo wogodoh eternally. Meen hayeh tam bel balad lamma kul wa7ed - bel 3afya - beyakul w yeshrab w yenam? Seyasa mashi 3aeha el nezam. Wharever you & I believe, seyasa nag7a. Nezam nage7 be nesba 3alya geddan enno yewageh tafkerna fe kul el nawa7ee elly ne7yeeto huwwa. Kul haga fel balad bete5dem el nezam da. Hatta e7na, somehow, bene5dem el nezam el qa2em, if we ain't a part of it. Ra2ees el gomhueiyya, believe it or not, ma huwwa ella guz2 mel nezam, mush ra2eesoh, ya3ne something for the system to safely hide behind. Consequently, beyseebo su7uf el mu3arda teshtem fih as much as they want. Lazem tafkeer keteer fel balad wel donia for one to reach an acceptable definition lel nezam. Elly 3agebne feeki en tafkeerik - in such a way - bedayet sekettik ennik 'tefhame' the way things actually are. It's adorable that you launched so early. 18 yrs w 4 months w 60 hrs sen so3'ayyar. Aham haga en el donia mata5udkish tensi eih elly kunte 3ayza tewsaliloh before all.

Keep your head up, mafeesh nass keteer zayyik. I know, for sure, you shall be a great person. You already are, anywayz.

Peace out
Noblez

الأباصيرى said...

انا عايز أعرف مين اللى أخترع موضوع التاج دة
بجد لازم ياخد جايزة أوسكار فى الفضايح ونيلة كمان السعفة الذهبية فى التسييح للبشر

كل ما أدخل مدونة الأقى كل واحد مسيح لنفسة بنفسة لوووووول
بيدى لابيد عمر

أجاباتك حلوة بس بلاش السجاير والشيشة بجد هيدمروا صحتك.. مالة البانجوا والحشيش زى العسل

سلام عشان أتفرج على المدونة بتاعتك

Halwsa said...

شيشة و سجاير ياوئام و انتي لسة 18 سنة؟؟؟ يخرب عقللك انتي كدة اخرك 38 و كدة يكون ربنا كرمك اوي ( بعض الشر عليكي طبعاً) خدي بالك من صحتك .. علشان الواحد بيعيش مرة واحدة بس

sara said...

شيشة و سجاير ياوئام و انتي لسة 18 سنة؟؟؟ يخرب عقللك انتي كدة اخرك 38 و كدة يكون ربنا كرمك اوي ( بعض الشر عليكي طبعاً) خدي بالك من صحتك .. علشان الواحد بيعيش مرة واحدة بس

مش هاقول أنا مين said...

انتى عايزة ايه ؟؟؟
هو فى ايه ؟؟؟
ما تبطلى بقى يا وئام
و بعدين ايه الناس دى .. انتوا بتعملوا ايه ؟؟؟
أنا ماشى يا عم !!

قنديل

we2am said...

يا صباح الورد يا جماعة..مبدئيا انا مش كابس عليا خالص ارد علي كومنتس عالتاجز..مش عارف ليه :)
انما فيه قضايا مثارة لازم نرد عليها منعا لإثارة الفتن والقلاقل :D
اولا التدخين..والله انا مبطلة بقالي فترة يا بشر..بس ده كان من باب الحاجات اللي الناس ماتعرفهاش عني..واشطة يعني دي حاجة بمزاجي..وسهل التحكم فيها..اطمنوا :)
ثانيا:اسامي الدلع..بودي ده بابا هو اللي قاله اول ماتولدت..ولزق فيا من ساعتها وانا بحبه..اينعم بيعمل كونفلكت مع كل العُبّاد..انما اشطة :)
توتة ده بقي حد غريب الصراحة..مش عارف ايه مزاجه في الاسم ده..بس هو عاجبني :)
ثالثا:الناس البيئة..من حقي اني ميعجبنيش نوعي معينة من البشر و الثقافة عموما..وبدأ دلوقتي في مصر ينتشر نوع من الثقافة الواطية و دي حاجة تشلني..من حقي..فككوا مني..بعد الشر عليكوا من البيئة :)

و احب اهدي التهاني لكل من الاباصيري و هلوسة و عبد الرحمن وتشافزيلل و انسانة صديقتشي الجديدة علي تشريفهم البلوج لاول مرة :D

el2ahwagi said...

gameel ...
telqa2i ... w shafaf...!

we2am said...

el2hwgi
:)
daiman b7wel akon shfafa ..enma eltlqa2yya deh 7aga msh bta3ty b2a :)

Anonymous said...

مشكووور أرجو منك ومن جميع الزوار موقعك زيارة موقع أكلاتى www.akalaty.com ويقوموا بإرسات أكلاتهم المميزه على الموقع وتمتعوا أيضا بقائمة الوصفات الموجوده به