.عودة الى ذلك الهسس الطفولي المحبب

ليه مش بقيت بتلعب معايا زي الاول؟!و قاعد علطول بتتفرج عالكتاب ده؟..هوا فيه صور ملونة؟
انا عايز اشوف انا كمان!
________________
تعالي نجري نجري نجري و ننط من فوق السور اللي ورا الجنينة..لأ ليه؟
ايه يعني اما حد يشوفنا بنجري في الشارع؟..انت بقيتي وحشة اوي..هاه
__________________
انا زعلانة اوي..امبارح بابا زعقللي لما عرف اني كنت باتفرج معاك عالكتاب
و قاللي متروحيش عندهم تاني..يعني مش هنلعب بالميكانو....اصل ماينفعش ننزل بيه الشارع..
ممكن حد ياخده مننا.. اسمع الكلام
__________________
شوفي انا سبقتك ازاي؟..انا باعرف اطلع السلم اتنين اتنين و انت لأه!!! انتي بقيتي بطيييييييئة
هاهاهاهاهاها
_________________
لا مليش دعوة...انا عايزة شوكولاتة..مش عايزة انا اللي بالمنجة ده..مش هاكله ماليش دعوووة
طب لو بتحبني..هاتلي شوكولاتة..ماشي؟
__________________
يا ......تعالي نروح نجيب ملح من عند الكشك..في كلب هناك..انا بخاف اوي من الكلب..هيعضني..مش هاينفع اروح لوحدي
..انزل بقي ماتبقاش وحش
___________________
انا مش هاطلع البيت..انا هفضل قاعدة عالسلم كده...اصل ماما و بابا بيكرهوني..انا مش بنتهم..
ماما قالتلي انهم لقوني علي باب الجامع..
"بكاء هيستيري"
__________________
علطول ماسك الورق و الاقلام..و الشنطة..و الخشبة دي..و بقيت مش بتيجي نلعب سوا بالعرايس
و بقيت بتعد في المدرسة كتير اوي..انتو بتاخدو حساب زينا؟ اصله صعب اوي!
___________________
انا مش عارفة اشوف حاجة...حد يشيلني بقي..حد يشيلني عايز اشوف الدب
بسرعة قبل ما يمشي..بسرعة
___________________
"عياط"ايه يعني لما ارسم علي الورق بتاع بابا؟؟ انا رسمت حاجات حلوة و الله..رسمت بيت و شمس و وردة
و لونتها كويس..ماطلعتش عن الخط..و السما كان لونها ازرق صح؟!
___________________
شوفتو ايه اللي حصل امبارح؟..شفت واحد بيبوس واحدة!!!...اه و الله بس بيبوسها في بقها...هشش
وطو صوتكو ده..لحسن حد يسمعنا يقول علينا قللات الادب..!!
_________________
انت بتبصلي كده ليه؟؟
________________
انا جبتلكو عسل من اللي ماما عملاه..اخدته باليل من التلاجة..انتو بقيتو مش بتحبوه؟!!
انا لسه باحبه خالص..هاكله كله لوحدي ..باي بااااااي
_________________
كل يوم كنا بنتقابل عشان نجيب ارواح و عسلية من عند عم حلمي سوا..و كنت بتجبلي ايس كريم
و نعمل بالعلبة الحمرا بقاليل صابون بعد مانخلص...انت بتكرهني؟ و لا انت كمان باباك قالك
ماتروحش عندهم تاني؟
_________________
بعد بابا ماطفي "التلفزون"باليل..انا دست عالزرار الكبير و فتحته تاني لقيت المسلسل
اللي قلتلكو عليه..يعني ايه انتو عارفين؟..طب مش بتقولولي ليه؟!!!
انا"مخمصاكوا"هاه
_________________
احسن..مافيش حد عايز يلعب معايا؟..احسن..انا هاخد كل اللعب و اطلع السطوح
هالعب لوحدي..مش عايزة حد يجي معايا..امشى..انت بالذات ماتجيش!!
________________
انا باكرهك باكرهك...مش عايزة اقعد معاك يأخي..سيبني بقي
انا هاروح..و هاقول لبابا انك خدت البلي و الشوكولاتة بتاعتي كمان..هاخليه يقول
لعمو..يضربك!
_________________
طب انا مش عايز انام دلوقتي!! انا عايزة اقعد معاكوووو.و النبي يا ماما عشان خاطري و النبي
بس خليني شوية...اوووووف اتغطيت اهو...اتخمدت خلاص!!!
______________
من وحي النكتة العبقرية الفلسفية المعقدة..العالمة بطبيعة النفس البشرية:
"لو كل اصحابي كبروا...انا هلعب مع مين؟!!!"
اللوحة:جاذبية سري

Comments

ده الدنيــا اتغيرت يا ولاد
على ايامى كنا بنهرب من المدرسه علشان نروح نشترى سجاير.. ونتشعلق فى الترماى اللى بيوح بحرى..
Anonymous said…
ياه يا وئام جميلة جدا
فعلا تحس إن الأطفال بس هم اللي من حقهم يقولوا كلمات من نوعية انا فرحان أوي او أنا زعلان اوي أو أنا بحب أو أنا بكره اوي من غير ما الناس تعتبر ده غريب هل لأن لسة مافيش ماسك على مقاسهم و إحنا لما بنكبر و نلبس الماسكات بنعتبر إبداء المشاعر بصراحة نوع من أنواع الوقاحة

فكرتيني بآية رمز البرائة في عيلتي لما وقفت في إزبهلال قدام المكتبة عندنا في البيت وراحت قايلة ياه كل ده و رق إنتو مارميتوهوش في الباسكت ليه

بقول لك إيه يا وئام كان عندك كام سنة و إنت بتكتبي الموضوع ده
admelmasry said…
ايه اتلروعة والجمال دا

انا حسيت اني رجعت خمسين سنه لورا ولا حاجة

بجد مالكيش حل
^ H@fSS@^ said…
الاول اسالك و احب اتاكد
انت اللي كاتبه الكلام ده؟
سلام
الله الله الله بجد بجد الله عليكى
انتى فجرتى جوايه حاجات كتير اوى
اهم حاجه منهم براءه الطفوله
البراءه اللى غابت دلوقتى
الله على كلماتك الجميله
وربنا يوفقك
ومنتظر زيارتك
karakib said…
اجزاء من سيناريو الحياه
كما قال علي ما أتذكر برنارد شو أن كل أنسان يصلح أن يكون كاتب جيد أذا كتب قصه حياته بصدق ..
حلوه أوي الحاجات الصغننه دي جمل صغيره هي خلاصه مشهد كبير أو احساس لطيف


هاني جورج
انتوك
We2am said…
المهاجر المصري
اه شفت الزمن؟..ده مفهوم البراءة نفسه اتغير :)

مصري
ده كلام الخواجة نيتشه ذات نفسه يا باشا:D
انا من الناس اللي مشاعرهم علي طرف لسانهم..مع الكلام الوقح :D
كان عندي 6 سنين ;)

ادم المصري
ربنا يجبر بخاطرك يا باشا..خمسين سنة؟؟هو انت رجعت بالسالب ولا ايه؟ :D

حفصتوشا
ده مما لا شك فيه سيادتك..هو انا هاجيب عيل يكتبلي ولا ايه؟ :D
سلامي انا كمان :)

الساحر
ربنا يجبر بخاطرك دنيا و اخرة..متشكري كتير...و الله انا كنت باكتب هسس..كويس انه رجعكوا لحاجة اصلا :D

كراكيب
هاني باشا جورج...ربنا يخليلنا برنارد شو:D
بس اغلب الحاجات دي من خيالي للاسف :))
متشكري كتير..انت بقيت صاحب الدكان بقي:D
ody911 said…
ياه يا وئام فكرتينى بالأيام الحلوة
شكرا ليكى على لحظات الطفولة إللى عيشتينا يها دى
بس المشكلة إننا رجعنا للحاضر الأليم مرة تانتى
بس أرجع وأقول
عادى بقة
أودى
^ H@fSS@^ said…
بصي بقى ما دام انت كاتبة حاجة حلوة كده فأنا ارفض التعليق لاني مش لاقيه اي كلمات مناسبة و امتنع عن التعليق الى ان تكتبي حاجة وحشة شوية فأقدر اعلق عليها

سلام
يا وئام
يا عبقرية
يا رائعة
Aladdin said…
مش باحب التقلييييييييييد (بكاء هستيري) مش تقلديني عشان أنا عملت حدوتة بالألوان قوس قزح!!!

(خارج السياق إلى حد ما): يا ترى أنا سمعت المزيكا دي فين قبل كده؟ (ابتسامة خبيثة) :))
Amira Hassan said…
يخرب بيتك يا وئام انا عيني دمعت
جبتيلي انتكاسة

بجد روعة احيكي
Diyaa' said…
y5rb bet kda ya beh
to2 to2 to2
ana 3agbny elpost kollo ella klmet hasas dy :D
esmo habal aw 3aba6...3aba6 lazm n7bo
mtegy n3ml 3yal :Dkol elly 3ndhom mdwnat mdw3yen bel6ab3 ;)
esh6a 3leky ...7lwa...fy w2t ana knt btw7m feh 3la 7aga 7lwa
slam
Aladdin said…
(تعقيب)

عايزة الصراحة ...

كانت محتاجة بعض التركيز،
كان فيها تكرار شوية ...

ومحتاجة حتة قماشة تلمعي بيها العدسة او تحركيها شوية عشان تخلي الريزولوشون اوضح.
We2am said…
اودي
ربنا يخليك يا سيدي..نعمل ايه بقي..لازم نرجع للاسف:))

حفصوتشا
ياسلام عليكي..والله دايما بتخجلي تواضعي اللي مش موجود اصلا:D
ربنا يخليكي ليا يا سكر..هيا البوسة بتتعمل ازاي هنا؟:D

علوة
مش تقليد ياخويا..ده عزف منفرد :D
و بالنسبة للمزيكا انا كمان باشبه عليها(ابتسامة ملاك) :)))

مرمر"مع الاعتذار لفؤش"
يا بنتي انا طول عمري باقول كده..اخيرا حد فهمني!! :D
ربنا يكرمك يا شيخة و ينورلك طريقك :D
وحشتيني اوي يا بنتي


ضياء
متشكري كتير كتير..ايا كانت الطفولة ..فهي جزء لا يتجزأ..طوبي لمن اخرجه علي السطح..و خلي البلاوي بتاعة المراهقة جوه:D

علوة2
ايوه كده يا عم..هات المفيد:D
متشكري كتير..انك قلت رأيك بصراحة و مسكت بوينت محددة ووضحتها..هي دي فايدة الكومنتس اصلا..حاضر..المرة الجاية هاركز اكتر من كده:))))
frozen love said…
zy ma 2ltlk keda..mn ktr manty rg3teny layam eltfola..we elmwakf ely ana 3mltha bnfsy zayk...sbteny...msh 3arf acomment 3la eh wla eh....nice blog bgd ya tota..2sdy ya we2am..lol
مُزمُز said…
وهكذا يكون معاذ قد تأكد أن تلك المسماة وئام هي مبدعة من طراز فرييييييييييييييييييييييييييييييييييييييد جدا

تحياتي لك
Diyaa' said…
lol @ 6oba
w elmorahka blaweha leha 7lawt-ha bs we didnt get the chance to enjoy it
or we have got the wrong chance
3moman rbna y2dem elly feh el5er
LAMIA MAHMOUD said…
لا يا وئام ما تخافيش يا حبيبتي مش حنبطل لعب معاكي يا ماما
زحبقى اجيبلك كادبوري كمان

عادي بقى كلنا بنقعد نفتكر في الهسهس بتاع زمان
ونقارن بينه وبين الهسهس بتاع دلوقتي

حلو يا وئام
حلو فعلا
We2am said…
frozen luv
احنا متثبتين جاهز يا دود..مش محتاجين ده يعني :D
متشكري كتير

مزمز
ربنا يكرمك ياباشا..يارب دايما
عجبك فعلا؟ :)))

ضياء
مش كفاية اني باكتب عربي اصلا؟!!!.:D
المراهقة اسمها كده من التعب..يعني مرحلة مقرفة و متعبة..ماتشفش وحش..ربنا يفك سجنك:D

lmy
وحشتيني يا بنتي..لا انا باحب جلاكسي ممكن؟..ده غير انكو مش بتلعبو معايا كتير كتير:D
ياتري انهي احلي؟..هسس دلوقت و لا زمان؟..
و ماحدش بيعشق منير..يقوللي ماهو دلوقتي زي زمان:D
كلمه said…
yaaaaaah ...embare7 kan 3omry 3eshreeeeeeeeeeeeeeeen :D

fe3lan 7aset eny keber :D
dead man said…
الهسس الطفولي المحبب.. ربنا يبارلك فيه.. ربما لآني لم أراه..

جميلة أوي التدوينة وأفتقد القدرة علي قول المزيد لغصة في الحلق
We2am said…
kelma
احنا شكلنا كبرنا زيادة عن اللزوم ولا ايه يا برنز؟:D

deadman
يعني انا اللي كانت طفولتي اشطة؟!!في اختراع اسمه الخيال يا عم:D
:Dربنا يبارك فيك و يتمم بخير
والنبي انا اسفة مش هاعمل كده تاني..بلاش الغصص بتاعتك يا احمد:S

Popular Posts