RSS Feed
و أنا..أنا..لا شيء آخر

Saturday, December 09, 2006

سارة ....انتيخي..!

سارة انتيخي..بس..مافيش اكتر من كده...و هو في اصلا اكتر من كده؟..اصل الصداقة دي بتتعدي الاخوة..دايما كنا بنقول لبعض..لو كنا اخوات..كنا هنتخانق ليل نهار..سارة..انتيخي..رغم ان انا من الناس الواثقين في دماغهم جدا..و عندهم اكتفاء ذاتي- و محدش يفهمني غلط-انما سارة لما بتقول رأيها في حاجة..بيطلع حاجة انا ماعرفتش اوصلها غالبا..و مهما فكرت و خبطت دماغي في الحيط علشان تبطل تفكير و ماتبطلش برده-..سارة بتقولها في كلمة بسيطة و في قعدة حلوة عندهم في البيت..و احمد يبقي نايم..و يطلع من الاوضة بالفانلة و الشورت -في الصيف..و الفانلة و البنطلون في الشتا..و محمد جاي من الشغل عايز ينام..او صاحي من النوم عايز يروح الشغل..و غالبا بيلاقوني في وشهم و هما الاتنين طالعين من الحمام..مش مع بعض طبعا
و مصطفي وراه درس او جاي من الدرس,,و في الحالتين مش عايز يذاكر و عايز يقعد معانا..و هاجر اللي مش بتمشي الا لما سارة تقولها-او انا احيانا-نورتينا..ده غير طنط اصلا..و انكل رفعت..و الله انا باروح ابقي عايزة اكلم سارة في حوار مهم و ضروري و مسألة حياة او موت..و الاقي العيلة كلها ماشاءالله حواليا...
احلي قعدة..و احلي عيلة.. واحلي و اطعم اكل من ايدين طنط..لما تخش تطبخ لاني طبيت عليكو فجأة
سارة انتيخي..سارة..لما تيجي تكلم في حاجة..بجد..تهزر..و لما تيجي تهزر تكلم بجد...بلاش المناخير يا سارة..انا عندي عقدة...و لما حاجة بتبسطها بتبقي مبسوطة اوي..و بجد..حتي لو انا مضايقة..لا املك الا اني ابتسم و بعد شوية اضحك..
سارة انتيخي...طول عمرها..ماستعملتش الماسكرا..و لا الكحل...اصل عينيها حلوة اوي..و رموشها طويلة..و لما تبصلك كده..تحس انك عايز تبتسم..علي ايه؟ او ليه؟ مش عارف..اسال رموشها..و عينيها السود
سارة..انتيخي..مش هزار ولا ادعاء..مرة انا كنت متضايقة اوي..من غير ماحس..لقتني و انا باسلم عليها في حضنها...حضنتني جامد..و قالتلي بطلي تفكري..بطلي..يا ريت كان بايدي يا سارة..ياريت..
سارة انتيخي..بتفهمني اوي..سيبك من الكلام اللي في نفس الوقت..و الافكار اللي ماتختلفش قيد انملة.. كفاية ان حد يبقي مش جنبك..و عارف انك بتفكر فيه..و انك اول ما حاجة هتحصل هتتصل تقوله..و هينزل جري يجيلك..عشان تفضفض معاه..عارف؟ الاحلال؟..نفس الموقف..انت بتطلع من المشكلة و تحط حد تاني بدالك..و تطمن خالص..لانك عارف انه هيتصرف كويس
سارة انتيخي...لما نبقي مأشفرين و معناش فلوس احنا الجوز..و ضياع بقي..و نبرشط علي بعض..يااااه..و نبقي هنصلب بعض علي كيس دوريتوس...او الستين قرش بتوع الميكروباص
بس برضه بنضحك..و الناس تتفرج علينا و تضحك..عارفين احنا بنحب بعض قد ايه
سارة ..لسه انتيخي..و هتفضل انتيخي..النداهة ماعرفتش تفرق بيننا..ولا اختلاف الاراء و القناعات..و لا الثقافة..الصراحة انا و سارة مختلفين في المنطقة دي شوية...شويتين..بتقري الكتب علشان خاطر انا اتسولت..و تسمع منير لاني تضرعت...ماتعدش معايا عالقهوة..و لو قعدت انا ماشيش..ماطلعش اي نوع من انواع الدخان اصلا..و لولا انه الهوا عديم اللون..كان زماني كتمت النفس...بعد ما شديت طبعا..
سارة انتيخي..الغزال الجميل النحيف..اللي مش ناوي يتخن ابدا..ولا يبان عليه اللغ اللي بيلغه...و لا يطمر فيه الايام اللي اكل فيها عندنا..مش بتيجي اصلا الا علشان تاكل..اصل ماما اكلها جامد الصراحة...يستاهل انها تيجي عشانه
سارة...انتيخي..اول مرة نتقابل كانت في اعدادي..اولي اعدادي علي وجه الدقة..السبب انه اختها كانت في نفس مدرسة اخويا الصغنن..و ماما قابلت قريبتنا اللي كانت بتوصلها..و هوب ايه ده..ده سارة في مدرسة السنية..ووئام كمان.و ماما تيجي تقولي..و اروح تاني يوم اخنق عليها في الفصل..و مش انتي سارة محمد رفعت؟ كانت عندها ضفيرة طويلة اوي..و لابسة جيبة بكسر و قصننة كده..ده غير عينيها الدبلي..الصراحة..تتصاحب-بنظرة ولد مراهق للامور-مع اني كنت مأنتمة حد في الفترة دي..اتخانقنا..و اتصاحبت انا وسارة..انا و هيا بندعي علي"طنط عيشة "اللي كانت السبب
سارة انتيخي...ماشاءالله..ماعرفتش اصاحب غيرها طول ايام المدرسة..و لحد دلوقتي والله..بس مش زي زمان..زمان كانت بتطفشهم كده..رباني..و نتخانق..و هتقعدي الفسحة مع مين و نقعد بالشهر و الاتنين مانكلمش..و مأنتمش..غيرها
سارة ...لسه انتيخي..و لسه مستحملة قرفي..و اسئلتي اللي مالهاش لازمة في الاوقات الحرجة..سارة.بدايات الدنيا و اخرها......ينتهي عندها السؤال..و تتخلي الاجابات عن عندها المقدس عند قدميها...لا يوجد ما تخشاه..سوي ان تفقدها
...
سارة..الي انا قاعدة باكتبلها دلوقتي..رن تليفوني..هيا اللي بتتصل ..مهما قلت..الوقت مش هيكفي..الزمن عاجز..قدام صداقتنا..
سارة...عيد ميلادها النهاردة...هتكمل تسعتاشر سنة...و انا بحبها اوي..و مش متخيلة تفاصيلي من غيرها...كتبت كتير عنها...و حاولت اختصر..مافكرتش..البوست ده مش هاقدمه لوزارة حسني..ولا هاسافر بيه النرويج..البوست ده لسارة...زهر اللوز او ابعد...كوباية الشاي بلبن...شجوية...ميكي جيب في الحمام..اوببببسس..انا هيست من كتر الكتابة تقريبا
سارة..انتيخي ..كل سنة و هي طيبة...سارة..انتيخي..صدقيني..بكره احلي من النهارده..شوفتي قد ايه؟

37 comments:

shaimaa said...

it's a gift from God 2 have some1 like her in ur life..it's a very special relationship ..rbna ye7'leko lb3d w mtfr2kosh elndaha 2bdn 3n b3d..
w blnsba 2n 2kl mamtk 7lw ..3yzen nb2a nzbt elmwdo3 da m3 b3d ya we2am;)

LAMIA MAHMOUD said...

كل سنة وهي طيبة يا ستي
ربنا يخليكوت لبعض وتفضلوا على قلب بعض وتفضلوا تبرشطوا على بعض
كل سنة وانتي طيبة عشان كل سنة وهي طيبة
ما علينا بقى

المهم حوار ميكي جيب في الحمام ده طلع في كل البيوت الظاهر

مصرى said...

كل سنة و إنت و هي طيبين
يا وئام
و إن شاء الله عمركوا ما تفترقوا

اصل الصداقة دي بتتعدي الاخوة.

عندك حق الصداقة أعلى بكتيرمن الأخوة لأن الأخوة الواحد مجبر عليها

sara said...

مش هقدر اقولك غير ان ربنا يخليكوا لبعض .. و ان ربنا انعم عليكي بصديقة عمرك .. لان الكثير فعلاً يفتقد هذة النعمة .. كل سنة و هي طيبة و انتي طيبة و انتوا الاتنين مع بعض ...انشاء الله

المزاجنجي said...

كل سنة وهي طيبة الاهى بجد طيبة ؟


اصل انت طيبة ربنا يخليكوا لبعض ويخللي لك طنط واونكل رفعت ومصطف واحمد والعيلة كلها بجد انت اللي طيبة علشان كده ربنا وعدك بالناس الطيبة


والله شكلكم واخدين بعض على حب ههههههههههه

تسـنيم said...

عارفة يا وئام كل صاحب يشبهه صاحبه فأكيد يا بنتي إنتي تستاهليها خليها جوة عنيكي وربنا يخليها ليكي..

وكل سنة وانتي طيبة بما انكم شخص واحد في جسدين.
محبتي.

صفصف لادي said...

كل سنة و هي طيبة
و كل سنة و انت طيبة
ربنا يديمها عليكوا نعمة

بجد احلى كلام اللي بيطلع من القلب
و انت فعلا جميلة المشاعر يا وئام
تحياتي

مصطفيتش ابن حفصوتشا said...

مش عارف ليه كل الناس بتقول انك تستاهلى واحدة زيها
وانك طيبة
جابوا المعلومات دى منين
ولا اذا كنت فى مدونة وئام امدح فى وئام
ملحوظة :.
انا بهزر

بجد
ربنا يخليكوا لبعض
وكل سنة وهى طيبة
قوليلها اونكل مصطفيتش بيسلم عليكى
سلام

ody911 said...

وئام
إنتى خلتينى أحب سارة أنتختك
وعاوز أقولها كل سنه وهيه بألف صحة وسعادة وراحة بال
وكل سنه وإنتوا مع بعض علطووول
أوعدينى إنك تقوليلها الكلام دة
ماشى
يالة باى بقة
أودى

Noran said...

بلغى سارة ..أن كل الناس هنا بتقولها
كل سنة وهى طيبة

كل سنة و أنتوا الإتنين مع بعض
وبتحبوا بعض ..وعالطول مع بعض
عارفة يا وئام ...ده أحلى حاجة تعمليها أنك توريها البوست ده

Aladdin said...

الصداقة المنزهة عن المصالح والبيزنس وما شابه شيء مقدس بالنسبة لي ... إنما أنا لاحظت حاجة في صداقة "البنات" المصريات أنهن يركزن في كثير من الأحيان عند وصف حبهن لصديقاتهن على الجانب الحسي أو "الجسدي" للصديقة!!!! يا ترى كان هايفرق معاكي - أو معانا - إن كانت عيون سارة مش "دبّلي" أو رموشها قصيرة أو شعرها مش طويل ومش ناعم وأنها تخينة زي دلفة الباب؟!!

مرّة لقيت مدونة مصرية مش فاكر اسمها بتمتدح "رجلين" صديقتها بشكل بالغ الحسّية!!! أنا طبعا مش قصدي إنك كده بس دي ملاحظة عامة أنا أخدتها.

من ناحية تانية، الجميل أنكما تحترمان "اختلاف" بعضكما البعض ... فهي تحترم كونك "مدخنة" وانتي تحترمين كونها "غير هاوية للقراءة" (ولو أن في محاولات من تحت لتحت للتأثير المتبادل "على أساس انتي تبطلي التدخين في مقابل أنها تقرا كتاب!!!)

موضوع "الأنتمة" دا انا مفهمتوش!! وهل هذا المفهوم مختلف عن مفهوم "الصحوبية" بين الولد والبنت في قاموس الشباب مواليد 1980 وما بعدها؟!!

dead man said...

سارة ...لسه انتيخي..و لسه مستحملة قرفي..و اسئلتي اللي مالهاش لازمة في الاوقات الحرجة..سارة.بدايات الدنيا و اخرها......ينتهي عندها السؤال..و تتخلي الاجابات عن عندها المقدس عند قدميها...لا يوجد ما تخشاه..سوي ان تفقدها...
----------
هنا سكت الكلام وخلصت التعليقات
كل سنة وانتي وهي طيبين وربنا يخليكو لبعض

we2am said...

shemo
فعلا يا بنتي..الصداقة بعد اخر للعالم..طريقة مختلفة في النظر للاشياء :)))
ماما؟؟انا؟؟!!ابدا!!:D
اكيد يابنتي..أؤمرني يا معنمي :D

lmy
و انتي اطيب يا جمييل..و الله بتنفع وقت زنقة..البرشطة دي اسلوب في الحياة:D
اه ميكي بتزبط المسائل علطول;D

مصري
عندك حق تماما :))
كل سنة و انت اطيب..ربنا يتم نعمته عليناو نفضل انا و سارة انتيخ:))

sara
ربنا يخليكي يا بنتي..الحمدلله..انا مش متخيلة حياتي من غيرها الصراحة..باعشقها :))

المزانجنجي
انت بتقول فيها؟!!زمان كانو بيتريقوا علينا اهلنا و يقولولنا اننا هنجوز في هاواي:D
دلوقتي احنا اللي بنقول كده:D
ربنا يخليك يا كبير..وهي طيبة..انا اللي شريرة هنا:))

تسنيم
و انت اطيب بانيابة عننا :D
ربنا يخليكي يا جميل..و يخلينا لبعض

حفصوتشا
ده من اعماك اعماك كلبي الصراحة:D
ربنا يخليكي ليا ..و سيبك من الواد مصطفي ده بقي..ركزي مع الطيبين امثالي:D

مصطفيتش
يا سيدي..قول اللي انت عايزه..نحن نعلي من قيمة الحرية هنا :D
في الواقع انا شريرة شوية..بس استاهل كل خير:D
و انت اطيب يا باشا يوصل:))

ody
و الله انا كمان بعد ماقريت البوست حبيتها اكتر من الاول!:D
كلامك وصل و فوقيه كام بوسة كده علي ماقسم:D
ربنا يخليك لينا

noran
انا قلتها فعلا..وهي فرحت اوي بالناس و البوست..هى بتقولي لني باكتب كويس..وان البوست احلي من الهدية:))

علوة
مممم..قد يكون هذا نوع من التطهر..تخليص النفس من شعور بالنقص..لان رموشي قصيرة و شعري كان الاجرسون ساعتها!
و من ناحية اخري قد يكون نوع من التحرر الكاذب..من نوعية"احنا بنكلم في الحاجات دي عادي خالص!"
و في النهاية النفس البشرية معقدة بما يكفي اننا نقري ملاحظتك و \مانفكرش كتير و نطنش::D
انا كده و باتكلم علي البنات كولد مراهق..الانتمة دي صحوبية جامدة اوي..زي مانا وصفت كده..سواء ولد و بنت او من نفس الجنس
سارة فعلا حد محترم...مهما كان اختلافنا..فنحن بنتفق علي استمرار صداقتنا في الاخر:))))

كلمه said...

fobia elsadaka entasharet wla eih ya ged3an :D

kol wa7ed bekteb elyomeen dol 3la 2as7abo ....... bs eshta wlahy post gamed 2a5er 7aga

kol sana w heya tayba w 3o2bal 231384747 sana ... w teb2o m3 ba3d bardo :D

we2am said...

deadman
ربنا يخليك يا باشا..الجزء ده عاجبني انا كمان بشكل خاص..ضعفي السرمدي تجاه الكتابة بالفصحي رغم اني قررت الكتابة بالعامية:))
و انت اطيب و مفرفش كده و كويس:D

we2am said...

kelma
thx duuuuude :D
والله ماتقليد يا اكسلانس..عيد ميلادها جه وش دلوقتي..نعمل ايه بقي؟:D
و انت اطيب و ربنا يخليك لينا يارب:D

mano said...
This comment has been removed by the author.
mano said...

ياه يا وئام
اية المشاعر الحلوة دى
انا مابحسدش بس بجد ربنا يخليكو لبعض
الصداقة احلى حاجة فى الدنيا
كل سنة وهى طيبة

Epitaph said...

you were talking about me and Azza!! thank you, We2am..it made my day!!

I loved this post...begad begad! I was with you!!

lama akteb 3n my friends you'd know insha Allah!

rabna ye7'leeko le ba3d!! masha Allah 3aliko

بين الأمل و اليأس said...

ربنا يخليكم لبعض يارب
وفعلا اجمل حاجه في الدنيا وارقى شيء الصداقه ولما تكون بهدف المحبه مش المصلحه
وكمان لما يكون قريب اوي كدا
وتواجهي الوحش والحلو وهي معاكي وتسندو بعض وتشدو ازر بعض وقت الشده
ربنا يخلليكم لبعضة
وكل سنه وهي طيبه
وكل عام وانتم احبه اكتر واكتر وربنا يدومهت عليكم نعمه
وربنا يسترها

المٌهَــــاجِر المَصْـــــــرى said...

انا دايما كده اجى متأخر لكل حفله وكل ميعاد
حاجه تكسف

كل سنه وانت بخير وهى بخير

سؤال هو اسم العيله بتاعها انتيخى بجد؟

Anonymous said...

بسم الله الرحمن الرحيم , و الصلاة و السلام على اشرف المرسلين و بعد ..
أنا كمواطن عادى .. أو نصف عادى , ساقته الأقدار لدخول هذا المدونة على غير هدى .. ولا دليل .. لماذا بحق الإله قد تجتاحنى حاجة أو رغبة .. أو طاقة .. لقراءة بوسط طوله 3 شبر و نص ( عديتهم ) فى هذا المدونة عن بنى أدم أو أدمة لا تربطنى بها أى علاقة ولا تجمعنى بها أى خبرات .. أم أن مجرد كون كاتبة هذه البوسط _ تلك التى هى أعظم من أن تستوعبها جمل التواضع البشرية _ وئام الرائعة كفيل بأن يجبرنى على قراءة شيئا كهذا؟ .. مجرد تساؤل ..
العزيزة سارة
أنا لا أحمل تجاهك أى ضغينة , بل أننى حتى لم أقرأ ما كتب عنك , ولكنى مندهش من الطاقة التى تبذل فى هذا المدونة و بالرغم من ذلك ماذالت مصر من أقل الدول فى العالم تصديرا للفوسفات !!
و شكرا على الإطالة

3asef said...

ما احلى هيك صداقة كل سنة وانتو سالمين يارب
يا هيك الصداقة يا بلا
:)
ان شاء الله للأبد
خمسة بعين الحسود
;)

frozen love said...

sebek mn eny h2ol kl sana we heya tyba...we rbna ykhleko lb3d we kl elklam ely enty 3rfa h2olo ezay da...bgd elpost 3gbny...ely hwa k2nk bt7ky msh btktby..nice post

we2am said...

mano
ربنا يجبر بخاطرك يا سكر..فعلا..الصداقة هي الاخر..و انتي اطيب:)))

epi
thunk u thunk u..ta2reban deh semat geel..enna bnsa7b kowes :))
i'll know akeed..rbna ye7'lke l 3azza:))

بين الامل و اليأس
سارة..بدايات الدنيا و اخرها فعلا..و هي حد محترم و متفهم جدا..ربنا يجبر بخاطرك..و انت اطيب:)))

المهاجر المصري
:D والله دي مأساتك الاغريقية الخاصة
و انت اطيب
هي هي..طول عمرك دمك خفيف..سكر :P

Anonymous
نورتنا..لا شئ يدفعك..وانت لم تقرأ بافعل..انا اعتبر المدونة شئ شخصي..من حقي ان اكتب ماريد..و انت تقرأ ماتريد ايضا..ليس كتابا تشتريه و الهدف منه امتاعك..لا يوجد مايجبرك ايضا ولا مايجبرني..ليس موقعي ان ازيد صادرات مصر من الفوسفات ولا حتي من اش شئ اخر..انا لنفسي..و من اريد..فقط
"عذرا "للاطالة في الرد

3asef
شو هاحكي الحلو؟:D
كل سنة وانت اطيب..نورت البلوج و انستنا..يارب دايما..اه والنبي..لحسن الحاجات دي بتتنظر:D

frozen luv
ana t3mdt eno yob2a 7kewa fe 23da :))
thx ya dude..w enta atyab :))

Anonymous said...

انتى بتكلمينى كدة ليه ؟؟

we2am said...

عشان ماحدش بيقول كده!!!
ده الرد المنطقي:D

Anonymous said...

امال ازاى ؟

we2am said...

Anonymous
انا كتبت ان البوست ده لسارة.مش عايزةتقديرمن حد..ليها لوحدها..انما اما اكتب كتابة ادبية بحتة.ابقي قول اللي انت عايزه..ولا ايه؟:))

nora said...

عجبتها الهدية و لا ايه يا وئااااااااااام يا رب تكون عجبتها انت خليتينى هموت و اشوفها اصلا..يا ستى يا بختك بيها و يا بختها بيكى

nora said...

على فكرة انا
nour
عادى بس ال
account
بتاعتى فيها حاجة غلط

we2am said...

nora aw nour msh far2a :D
عجبتها طحن يا بنتي..تشوفيها ايه؟ مش لما اشوفك انا الاول؟!! :D
مبروك عالبيتا يا باشا:))

Amira Hassan said...

ؤبنا يخليكوا لبعض يا بنتي

زهر اللوز او ابعد انا بعشقه بعيد عن اي حاجه

we2am said...

mrmr
ربنا يخلي الجميع للجميع يا بنتي..مش ناقصة المزيد من الرحيل :D
طبعا زهر اللوز..ده مما لا شك فيه ;)

Sampateek said...

الله يا وئام بوست حلو قوي فكرتيني بصحبتي الانتيخ و كنت قابلتها في اولى ثانوي برضه و قعدنا حوالي عشر سنين صحاب لحد متجوزت و جوزها بعيد عنك نضح عليها رخامة و حقد و سقالة
مش قادرة اصدق ان دي انتيخي اللي كنا منبطلش ضحك
اتمنى ده ميحصلش معاكي انتي و سارة
و كل سنة و هي طيبة و انتم احلى اصحاب في الدنيا
قبلاتشي

sendrlla said...

ربنا ما يحرمكوش من بعض
كل سنه وانتى طيبه يا ساره

we2am said...

كلبوزة
نورتي البلوج..لولولولوي :D
ده خوفي انا وسارة ان جوزها يبقي كده..علي اساس ان انا هاعنس! :D

sindrella
ربنا يخليكي.كل سنة و انت اطيب..نورتي البلوج :))