RSS Feed
و أنا..أنا..لا شيء آخر

Saturday, December 23, 2006

عصاية و اه..




و انا باعرف امشي لوحدي
من غيرك..اه
مش كل ماشوف عصاية
و اسند عليها..
افتكرك..واقول اه..



سبتني..فكان مرار
بكام بعت يا عم؟
والله التراب غالي
و الرخيص كان الدم
لا تهتم..
وانا بعرف نهاية الاسفلت
اما يبتدي الرصيف
كان لازم يتمشي
مالعشق وصل منتهاه
و انا..ماقلتش لا..



مش كل ماشوف عصاية
واسند عليها
افتكرك..واقول اه


اتحسب من شراييني
الكلام اللي بفلوس
والقلب اللي بينسى
اما الشفايف تبوس
...و تدوس
علي حبة صدف
...ماوشوشناهوش
لكن رهننا اللؤلؤة.




مش كل ماشوف عصاية
اسند عليها..
و افتكرك و اقول اه

كنت بتقول:
"نواية تسند الزير"
و انا اضحك اوي
وانسي
اما تلمس خدي
ان النواية..زي العصاية
شئ خطير!



مش كل ماشوف عصاية
واسند عليها..
افتكرك واقول اه


ومش كل اما ابلع ريقي
احس بالذنب
ماهو مش منطقي
اني اسيب الزمام
للجرح الشقي
يعبث بمنطقي
ولا اسيب منطقي
مدار سرمدي
لكوكب مالوش مكان
في السما
خرج للابد..من رحمتي




مش كل اما اشوف عصاية
واسند عليها..
افتكرك واقول اه
واسند علي جدار
فينهد
و اسند علي قضايا
فينمحي
واسند علي مؤمن
فيرتد
واسند علي الماضي
فيختفي
و في النهاية اكتفي..
بعصاية
في قبضة يدي



تعبت من الكسر انا..
ياااه..من كام سنة؟!
يا بحر..انا عايزة تاني اللؤلؤة
يا كلام اغاني..اوصل شراييني
هيخرج من الحنايا
و يغور من حنايا طريقي
بس انت رجعلي تاني الصبا..



مش كل مامسك في رضايا
اشوف عصاية
اسند عليها
.فافتكرك
..تكسر

فاقول اه!..0
اللوحة :زينب السجيني

33 comments:

LAMIA MAHMOUD said...

ومش كل اما ابلع ريقي
احس بالذنب
ماهو مش منطقي
اني اسيب الزمام
للجرح الشقي

يعبث بمنطقي
ولا اسيب منطقي
مدار سرمدي

لكوكب مالوش مكان

في السما
خرج للابد..من رحمتي



حلوة يا وئام .. مش منطقي فعلا نسيب ايامنا وحياتنا لناس خرجوا منها

مش منطقي افتكرك واقول اه:(

مصرى said...

تعبت من الكسر انا
ياااه..من كام سنة؟!
يا بحر..انا عايزة تاني اللؤلؤة
يا كلام اغاني..اوصل شراييني


جميل اوي يا وئام

مصـ( الخير )ـعب said...

وانسي
اما تلمس خدي
ان النواية..زي العصاية
شئ خطير!

No more comment there should be!

مصرى said...

وئام

بتجيبي لو زينب السجيني منين

Chavazelle said...

Such a beautiful flow of words. Thanks.

nour said...

يا بنتى انت كل يوم بتدهشينى اكتر..اسلوبك رهييييب..فظيعة..تشبيهاتك حلوة جدااا..ايه ده انا بحسدك و لا ايه؟؟
:))))
لا بجد ده المعتاد منك يعنى يا وئوومه انك تكونى رائعة..
وتحفة برضه

Amira Hassan said...

ايه يابنتي ده خرب بيتك ...رائع يا بنتي عبقري
انتي فنانة

ody911 said...

وئام
بجد جميلة جدا الكلامات دى
أنا مش عارف تصنيفها بس عجبتنى
وأكتر حاجة عجبتنى دى


سبتني..فكان مرار
بكام بعت يا عم؟
والله التراب غالي
و الرخيص كان الدم

لا تهتم..
وانا بعرف نهاية الاسفلت
اما يبتدي الرصيف
كان لازم يتمشي
مالعشق وصل منتهاه
و انا..ماقلتش لا..



وعادى بقة
أودى

we2am said...

lmyyyy
مش منطقي اي حاجة هنا الصراحة:D
انما..سخرية القدر لها يد..و يد طويلة و طايلة..ولا ايه ؟ ;)))

مصري
ينورلك طريقك :))

مصاعيبوز
just u bieng there saying what u think..houonoerd! :))

مصري تاني
مالكش فيه.. :D
مصادري الخاصةبقي

chavazelle
wlcm to my blog first..glad to c ya here..glad u liked it..i'll check ur blog too :)))

nooooour
ينورلك طريقك ياشيخة..سكر انتي والله :D
و يا ستي لا سحر ولا شعودة :D
وصل الاحساس يا ام احساس مرهف؟ :P
انتي حد بيفهم يابنتي ;))

MRMR
لولولولي..المبدعة العظيمة تتحدث حصريا الي بلوجي ابن الفقرية :D
ياشيخة يارب تتجوزي انت وفؤش السنة دي..انا اللي هاسعي عشان الكلمتين دول :D ينورلك طريقك

ody
ده اسمه "زجل"والله اعلم..
مشكري كتير كتير انه عجبك..خلاص بقي عادي فعلا :D

بين الأمل و اليأس said...

مش عارف اعلق واقول ايه بصراحه لساني عاجز عن ابداء الاعجاب
لكن فعلا

والقلب اللي بينسى
اما الشفايف تبوس...و تدوس
صعبه اوي مش كدا
ربنا يسترها

pharoh_e said...

انتى اللى كاتبة الكلام ده؟
بصراحة ياوئام حاجة بدييييعة
تحياتى وعقبال ماتعدى امتحان النتورك :)

karakib said...

كنت بتقول:

"نواية تسند الزير"

و انا اضحك اوي

وانسي

اما تلمس خدي

ان النواية..زي العصاية
شئ خطير
----------------
الكلام يقطر حزنا
حب أنتهي لم يكن حبا .. نخطيء عندما نضع ثقتنا في من لا يستحقونها

shaimaa said...

مش كل ماشوف عصاية
واسند عليها

افتكرك..واقول اه

7lwa 2wiii ya we2am.. bs lel2sf hoa de eli be7sl m3 eno

ماهو مش منطقي
اني اسيب الزمام
للجرح الشقي

Aladdin said...

جميل الحركة الدائرية للقصيدة يعني أولها هوا آخرها قصدي أنك بدأتي بالنهاية.

لم استسغ تماماً لفظ "العصا" رمزاً للسَّند الذي يمثله الحب في هذه التجربة (لأن هذا يستدعي (على الأقل بالنسبة لي) أنه مجرد "عكاز" لامرأة عجوز) ولا أظن أنك قصدت أن تنقلي إلينا هذه الصورة!

دا غير أن المقطع بتاع "المنطق" آخره في تحدٍ واستعلاء غير مبرر حيث تحولت فجأة إلى "ربّة" خرج هو "للأبد .. من رحمتها"!! (تذكري صورة العجوز التي تستند على عصا؟!!


الجزء اللي فعلاً عجبني من حيث الفكرة هو: (اتسحب من شراييني الكلام اللي بفلوس
والقلب اللي بينسى
اما الشفايف تبوس...و تدوس
علي حبة صدف...ماوشوشناهوش
لكن رهننا اللؤلؤة)

استوقفني الجزء دا كتير وقريته أكثر من مرة، استوقفني به هذا الالتباس المحبب!! حيث لم يعد هناك سوى الكلام "الرخيص" فعندما "ينسى" القلب و"يتسحب" الحب من ذاكرته تتحول "الشفايف" التي تقول الكلام "الغالي" وتقبّل قبلات الحب إلى كلام "رخيص" جارح مثل الأحذية الثقيلة التي "تدوس" على الحب والذكريات والقلب وكل ما هو جميل.

وكما يحافظ البحر على صدفاته، وكما تحافظ الصدفات على "اللؤلؤ"، كانت هي تودع هذا الحب قلبها، لكن للأسف بعدما كنا نريد الاستماع إلى "وشوشة" الصدف ولؤلؤه، بتنا "نرهن" أعز ما نملك لفقرنا وضيق ذات اليد أو بالأحرى لضيق ذات القلب - إن جاز التعبير!!

nirfana said...

بجد رائع

Epitaph said...

Touched me somewhere , we2am!

If I quote parts from it, I will copy and past the whole piece here! :) wtg ya benty,.,, you've got that lovely style indeed! masha Allah

sherif gharib said...

وئام
اللى مش طبيعى اننا نفتكر ناس هما نفسهم اللى كاموا قاصدين انهم ينسونا و هما برده اللى اختاروا انهم يقسونا
ما نسيب الماضى يبقى ماضى و نخلى العصايه بس تكون اللى اتعلمناه منه يمكن ده اللى يخليها تمشينا لقدام
تحياتى يا نجمه

طلال فيصل said...

يعنى اول تدوينة اقراهالك فى حياتى تكون عبارة عن لوحة للأغتراب والحزن والوحدة..لكن والحق يقال..مرسومة حلو..بس المرة الجاية شوية تفاؤل..شوية سعادة..لو سمحت

frozen love said...

nice post wlahy ya benty..fe aktr mn part 3gbonyy..aktr mn wa7d brdo..welcome to that world..awzan we 7rkat..go ahead

we2am said...

بين الامل والياس
و من امتي كانت سهلة؟!! :)))

pharouh_e
انا اللي كتباه فعلا..ممنونة جدا انه عجبك..وياتري عرفت منين موضوع النتورك؟..ده حاجة**** :D
..
krakib
مش شرط.حب انتهي..كان حبا وانتهي..وان نخطئ فهذا معناه اننا علي بداية طريق الصواب..نحن بشر في النهاية..لازم نجرب للي نقدر عليه في الدنيا..ولا ايه؟ :D

shosh
dah kalam yabnty..a3'any w 2sh3ar w bta3..mafesh 7aga mn62ya ene aktb dah aslan..mafesh sabb yan3i ;))


alaadin
الصراحة يا لول..انا مش هقدر ارد عالنقد المش طبيعي ده حاليا..لاني هاموت من النوم فعلا :D
انما رايك اتحط في الاعتبار..وهارد عليك رد جامد..wait 4 it :)))

nirfana
اشكرك جدا..

epi
thx alot ya gameel..ur opinion is just important daiman :))
do u think mowdo3 za style dah? :))

shrif 3'reb
والله انا مش عارف مين للي غلطان..اللي ساب ولا اللي اتساب.ده عشان هجر..مع ان له اسباب..ولا ده عشان لسه فاكر وعايش وهم..ومش عايز ينتصر لنفسه؟؟
اشطة يا نجم :D

طلال فيصل
لولولي..شرفت بلوجي يا باشا :D
والله انا طول عمري باشجع الانس ولفرفشة..ده حظك بقي اللي جه هنا غلط..هحاول اشطة :)))

frozen luv
thx ya pasha..dah b3d ma3ndkom fe3lan :)

قنــــــديل said...

مصادر مؤكدة من الأمم المتحدة .. مصر مازالت من أقل الدول فى العالم تصديرا للفوسفات

تامر العفيفي said...

حالة رائعة
ولغة بديعة بتاخد القارئ لمنحنيات صعبة
تحياتي

karakib said...

أنا رأيي حب أنهي لم يكن حبا
لأنه الحب لا نهائي غير محدود و لا ينتهي أبدا
كل سنه و أنت طيبه

mano said...

كل سنه و انت طيبه يا وئام
عيد سعيد
و سنه سعيدة

المٌهَــــاجِر المَصْـــــــرى said...

كل سنه وانت طيبه يا وئام

Noran said...

فنانة ...رائعة ..و أكثر

وانسي
اما تلمس خدي
ان النواية..زي العصايةشئ خطير!
....
أقول إيه عن البكتبيه يا وئام ؟؟؟
يدوخ

عجابنى

we2am said...

2ndeeel
فكك مني بقي..ماتخلناش نقول مالناش دعوة بمصر زي المرشد :D

تامر العفيفي
لولولولي..نورت بلوجي يا باشا :D
ممنونة جدا..انت شايف ان في امل ولا ايه؟ :))))

karakib
معني كده..انك لوحبيت واحدة وانت عندك 20 سنة..بجد..ومافيش نصيب..حياتك هتقف..يا اما يبقي ضيعت عمرك معاها عالفاضي؟!!!
كل سنة وانت اطيب :)))

mano
وانت اطيب يا بنتي..فينك..عندك امتحانات ولا ايه؟ :D

المهاجر
وانت اطيب يا عم :))

noran
والله انا اللي مش عارفة ارد اقول ايه؟..عجبني اوي انه عجبك و حسيتيه..انا اللي دخت من رايك اصلا :D

Mony The Angel said...

تعبت من الكسر انا..

ياااه..من كام سنة؟!
____________________
مش كل مامسك في رضايا

اشوف عصاية

اسند عليها
.فافتكرك
..تكسر


فاقول اه!..0

bgad to7fa aweee..
almaqta3een dool 3agaboony mooooooooooooooooooooooooooooooot

we2am said...

money the angle
rbna yenwrlk tre2k ya she7'a :D
enbst awe enhm 3gboky..dah m3nah en feh aml :))
wlcm 3ndy :)

dead man said...

أحيانا يكون منطقي .. عندما لا تجد شيئا أخر تفعله

we2am said...

dead man
عندما لاتجد شيئا..لاتتسلي بالعبث في جروحك القديمة..ابحث عن جرح جديد :)

OMA said...

جميييله اوي الخاطره دي ياوئام

عجبتني الحته دي اوي

مش كل ماشوف عصاية
واسند عليها

افتكرك..واقول اه

احييكي ياوئام..على فكره انا اسمي وئام زيك والوئامات نادرين في الزمن ده

احييكي بجد :)

we2am said...

oma
والله انا احيكي علي اسمك الجميل الاول :D
ربنا يجبر بخاطرك يا شيخة..
صعب انك كل ماتشوفي عصاية.بدل ماتسندي عليها تهدك..صعب
منورة عندي..يارب دايما :)